MGA SUGBOANON NGA ATLETA PASIDUNGGAN

Ipahigayon sugod karong alas 2:00 sa hapon ang 35th San Miguel Beer-Sportswriters Association of Cebu (SMB-SAC) Cebu Sports Awards sa North Wing sa SM City Cebu.

Motunga sa kalihukan si Alaska Milk Corporation president ug CEO Wilfred Steven Uytengsu, Jr., kinsa maoy napiling Sportsman of the Year awardee.

Si Yutengsu natawo sa Sugbo ug maoy presidente sa Sunrise Events Inc., nga maoy nahimong instumento nga makonsiderar ang Sugbo nga pinuy-anan sa Cobra Energy Drink 70.3 Ironman.

Karong Agusto ning tuiga ipahigayon na sab sa Sugbo ang Cobra Energy Drink 70.3 Ironman sa ikaunom nga sunodsunod nga tuig.

Ang SEI nakapaila sa probinsya sa Sugbo mapa sa kalibutan sa half ironman hilabi na sa miaging tuig diin gipahigayon dinhi ang Asia Pacific Championships. Ang

world-class event unang gipahigayon dinhi sa Sugbo niadtong 2012.

Ang 70.3 Ironman dinhi sa Sugbo mao na’y labing gitangan nga lumba sa triathletes gikan sa nagkadaiyang suok sa kalibutan. Sulod lang sa minutos, mapuno na dayon ang rehistrasyon niini.

Ang pag-host sa Sugbo sa 70.3 Asia Pacific Championships sa miaging tuig nakadawat og overall satisfaction rating nga 87.9% ug gitawag kining “crown jewel of Asia.”

Isip presidente sa SEI, si Uytengsu maoy napili sa SAC isip mananaog sa usa sa special awards ning tinuig nga kalihukan. Si Uytengsu usa sab ka triathlete.

Gihatagan sab og imbetasyon ang Cebu City Sports Commission, Cebu Provincial Sports Commission ug ang nangaging mga presidente sa SAC.

Athlete Of The Year

Moabot sa 200 ka mga atleta ang pasidunggan sa SAC gumikan sa kalampusan nga ilang nakab-ot sa miaging tuig lakip na niini ang 18 nga hatagan og major awards diin pilion ang mananaog sa Athlete of the Year award.

Lakip sa major awardees mao sila si Mary Joy Tabal, kinsa maoy labing unang Pinay nga nakadagan sa Olympics; June Mar Fajardo, kinsa nahimong MVP sa Philippine Basketball Association (PBA) sulod sa tulo ka sunodsunod ngva katuigan; ug Samantha Gem Limos, kinsa maoy gitawag og fastest woman sa Palarong Pambansa sa miaging tuig.

“Sports fans should not miss this. This is a chance for them to meet the Cebuano superstars in the country and the future stars,” pamahayag ni Mike Limpag, kasamtangang presidente sa SAC. Ang Philippines longest reigning boxing world champion nga si Donnie Nietes ipahiluna sa SMB-SAC Cebu Sports Awards Hall of Fame gumikan sa iyang talagsaong kalampusan.

Kapila na sab napili si Nietes isip Athlete of the Year. Ning higayuna, nakadesisyon ang SAC nga angayan nang ipahiluna si Nietes sa Hall of Fame.

Mohatag og dugang kolor sa kalihukan mao ang pasundayag sa Team Cebu City Dancesports, WEKAF, University of the Visayas Green Lancers ug mga sakop mismo sa SAC.