Dimalas sa GSW naputol

Miabante si Stephen Curry sa ika-10 nga puwesto sa all-time three-point list dihang iyang napangulohan ang Golden State Warriors nga makabangon gikan sa duha ka sunodsunod nga pilde ug pahimungtan ang host New York Knicks, 112105, kagahapon sa National Basketball Association (NBA).

Ang Warriors, nga nasugamak sa duha ka sunodsunod nga pilde gikan sa pagkaangol sa ilang usa sa mga sinaligan nga si Kevin Durant, nakasandig og maayo kang Curry ning higayuna.

Ang reigning two-time NBA Most Valuable Player, kinsa dili maayong nakaduwa sa miaging duha ka mga duwa sa Warriors, nangigo og balik ug nagpakatap kini’g 31 puntos lakip na niini ang lima ka three-point shots.

Nailugan og puwesto ni Curry si Chauncey Billups sa alltime three-point list.

“We haven’t been playing our best. It was showing as we lost two in a row,” matod ni Curry. “Just the way we were playing wasn’t great so we wanted to get back to who we are.”

Gawas kang Curry, maayo sab nga nakaduwa ang iyang kauban sa Splash Brothers nga si Klay Thompson, kinsa nipupo og 29 puntos. Kini maoy ika-42 nga higayon nga nagkumboya ang Splash Brothers og 60 puntos o pataas.

Ang Knicks gipangulohan ni Derrick Rose pinaagi sa iyang 28 puntos samtang nidugang og 24 puntos ug 15 rebounds si Kristaps Porzingis.

Ang Warriors mingsaka sa 51-11 nga rekord samtang ang Knicks nahagsa sa 25-38 nga rekord. Ang duha ka free throws ni Thompson nakahatag sa Warriors og 96-83 nga labaw sa nahabiling 9:04 minutos.

Apan ningbawos ang Knicks og 13-1 nga rally aron pahakan og dako ang labaw sa Warriors, 97-96. Gipasutoy og balik sa Warriors ang ilang opensa aron inaton ang labaw, 110101, sa nahabiling 69 segundos.