KWARTA SA 5 KA PULIS PUGNGAN

SABALONES MITUMBOK NILA NGA APIL SA DRUG OPERATIONS: PDEA 7

Labing minos sa lima ka mga police official gitakdang isunod sa Philippine Drug Enforcement Agency (PDEA) 7 sa pagpugong ang ilang mga kabtangan, apil na bank deposits, human gilambigit kang Franz Sabalones, giila nga drug lord sa probinsya sa Sugbo.

Ang mao nga mga pulis, apil niini mga opisyal, giingon ni Sabalones nga nagdawatan og payola gikan niya.

Gipakita ni PDEA 7 Director Yogi Filemon Ruiz ang

drug matrix ni Sabalones nga nag-lambigit sa iyang illegal

drug trade sa Sugbo diin kapin sa lima ka police official ang nalakip sa maong listahan.

Apan wa gipaklaro ni Ruiz kon kinsa ang mga pulis tungod kay nagpadayon pa ang ilang imbestigasyon ilabi na sa mga naangkon niining luhong butang sama sa mahalong sakyanan, yuta ug balay, lakip na ang dagkong deposito sa bangko.

Giingong nalakip sa pinanumpaang pamahayag ni Sabalones ang maong mga pulis nga naka benipisyo sa iyang ilegal nga negusyo.

Makig-alayon usab ang PDEA 7 sa Regional Internal Affairs Service 7 nga maoy mihimo sa lifestyle check sa maong mga pulis aron matakdo nila ang mga record nga makapalig-on sa kaso nga ilang ipasaka sa korte.

Gipasabot ni Ruiz nga human unya sa ilang makuha nga dokumento, ilabi na sa kabtangan niining maong mga pulis, ila na kining iduso sa Anti Money Laundering Council (AMLC) sa kaulohan.

Ang AMLC modala niini sa korte alang sa pagpagawas sa kamandoan ug pagpugong sa ilang mga kabtangan.

Sa lima ka mga pulis, dunay giklaro si Ruiz nga police official apan wa na niya itug-an kon kinsa kini apan giingong nadestino sa syudad ug lalawigan sa Sugbo.

Nakakuha na og ngalan ang PDEA7 sa mga gaway ni Sabalones nga nagpadayon sa ilang illegal nga negosyo nga nasusi na usab nila ang katigayonan ug sa mosunod nga mga semana mahimong makapagawas na ug kamandoan ang Court of Appeals. /