Plunder ipaapil ni Binghay sa death penalty bill

Kon aprobahan usab sa Senado ang balaudnon nga magpabalik sa silot kamatayon sa nasod, angay nga iapil ang plunder sa mga masilotan niini.

Kini ang gipadayag ni Msgr. Esteban Binghay, episcopal vicar sa Artsidyosesis sa Sugbo.

“Kon ipasar nila ang death penalty, iapil pud nila ang graft and corruption, plunder, kay kana ang nakapapobre sa atong nasod. Kana ang hinungdan nga ang mga pobre nidangop sa unsang mga paagi aron sila mabuhi,” pahayag ni Binghay sa pakighinabi sa Superbalita Cebu kagahapon.

Siya nakasaway sa mga Katolikong kongresista labi na sa mga Sugboanong magbabalaod nga nibotar pabor sa pagpalabang sa balaudnon sa Ubos Bay Balauranan niadtong Martes.

“Naikog unta sila sa simbahan, Katoliko man unta sila, mao gud na ang baruganan sa simbahan (nga supak sa death penalty),” dugang ni Binghay.

Sa 10 ka mga kongresista sa Sugbo, 8 ang nibotar pabor sa pagpalabang sa balaudnon, usa ang nisupak ug usa ang wala mobotar.

Kinatibuk-ang 216 ka mga kongresista ang niuyon ug 54 lang ang nisupak.

Si Binghay nagtuo nga dunay pressure gikan sa taas o Malacañang hinungdan ang mga kongresista nipabor sa pagpasar sa death penalty bills labi na sa kahadlok nga mahukasan sa ilang mga puwesto.

Siya nidugang ang mahimo sa simbahan mao ang pagkampanya, pagtuktok ug hangyo sa mga parokyano nga likayan ang paglambigit sa ginadili nga drugas. /

Naikog unta sila sa simbahan, Katoliko man unta sila, mao gud na ang baruganan sa simbahan (nga supak sa death penalty). - Msgr. Esteban Binghay