7 KA BARANGAY KAPITAN PASAKAAG KASONG KRIMINAL
Nag-atubang og kasong kriminal ang pito ka mga barangay kapitan nga kaalyado sa Team Rama human sila nagmagahi sa pag-uli sa mga sakyanan sa City Government ngadto sa lainlaing sala sa Municipal Trial Court in Cities.
Ang Cebu City prosecutors office nirekomendar nga pasakaan og kaso silang kanhi Kapitan Joel Garganera (City councilor na karon), Ramil Ayuman sa Apas, Phillip Zafra sa Tisa, Lemar Alcover sa Sambag-I, Ana Tabal sa Tagba-o, Rosalina Callino sa Buot ug Yolandito Cagang sa Basak Pardo nga pulos kaalyado ni kanhi mayor Michael Rama.
Matod pa ni Prosecutor II Benison Harayo, ang pito ka mga barangay official nakalapas sa Article 221 sa Revise Penal Code kon kapakyas pag-uli sa propiedad.
Si kanhi acting mayor Margarita Osmeña niadtong Hunyo tuig 2016, nimando sa tanang giisyuhan og sakyanan sa City Hall sa pag-uli para sa imbentaryo.
Matod pa ni Ayuman nga moduso ang ilang kampo og motion to quash para ma-paway bili ang resolution sa prosecutors office.
Ang tanang sakyanan nga giisyu kanila nauli na ngadto sa General Services Office paglabay sa pipila ka semana human nimando ang asawa sa mayor.
Apan kon isalikway ang ilang motion ug malutsan sila og warrant of arrest sanglit mao kini ang paagi para paghusay sa kaso.
Base sa resolution, ang kaso nga giatubang sa pito ka konsehal adunay P6,000 nga piyansa.
Si Ayuman nihulagway ni Mayor Tomas Osmeña nga “Tom Bully” sanglit human sa mga negusyo nga gusto niyang pasirad-an sama sa SM Seaside City, karon sila na usab ang gigukod sa mayor.
Si Ayuman nisang-at og kasong administratiba ug buot usab nga masuspenso si Osmena didto sa Malacañang sa niaging buwan.
Si Zafra kinsa maoy presidente sa Association of Barangay Council nagkanayon nga ilang atubangon ug tubagon ang maong kaso didto sa korte sanglit para nila wala silay sala. /