12 ka mga empleyado sa barangay nagpositibo sa gidiling drugas

Miabot ngadto sa 12 ka mga barangay employee ang nasutang tiggamitang og illegal nga drugas subay sa gipahigayon nga surprise drug test sa Cebu City Office for Substance Abuse Prevention (Cosap) sa upat ka barangay sa north district.

Si Dr. Alice Utlang nilusad og kinalit nga drug test ngadto sa mga barangay tanod ug garbage loader sa Pahina Central, Sambag-I, Sambag-II ug Sta. Cruz sa niaging adlaw.

Sa impormasyon nga gipadangat ni Konsehal Dave Tumulak, chairman sa committee on public order and safety ug deputy mayor for police matter, adunay pito ka mga garbage loader ug usa ka barangay tanod ang positibo sa barangay Sambag-I.

Tulo ka garbage loader anaa mag alagad sa Pahina Central ug laing usa ka drayber barangay Sta. Cruz.

Hinuon pulos negatibo ang drug test sa mga kawani sa barangay Sambag-II.

Si Utlang, executive director sa Cosap, nagkanayon nga gipaubos usab sa drug test kagahapon ang mga empleyado sa Cosap, Zoo ug sa Department of Veterinary Medicine and Fisheries ug pulos usab negatibo ang resulta.

Matod pa ni Utlang nga giapil usab nila pagpa-drug test ang ilang mga buhatan aron magsilbe usab kini nga modelo ngadto sa ubang barangay. Kinahanglan nga unahon nila og limpyo ang ilang opisina.

Si Mayor Tomas Osmeña nagkanayon nga ang nagpadayon nga surprise drug test sa mga kawani sa barangay partikular sa tanod ug loader magsilbi kini nga paghinlo sa mga pangalan sa mga adik.

Usa usab kini sa mga basehan sa iyang paghatag og monthly incentives sa maong mga barangay worker. /