DILG mihimo usab og pakisusi sa CPDRC

Human ang imbestigasyon sa Commission on Human Rights, ang Department of Interior and Local Government (DILG) na usab ang nihimo og pakisusi sa Cebu Provincial Detention and Rehabilitation Center (CPDRC).

Inisyal nga nabantayan sa DILG ang hilabihang kadaghan na sa mga piniriso sa maong pasilidad.

Matod ni DILG 7 Director Rene Burdeos, kaugalingong inisyatiba sa ilang ahensiya ang pagpahigayon og imbestigasyon sa CPDRC human usab nagbansiwag sa balita ang mga kontrobersiya ug uban pang panghitabo sa prisohan, sukad pa sa miaging semana.

Kauban ni Burdeos sa iyang pagsusi sa prisohan ang mga representante sa Bureau of Jail Management and Penology ug sa National Police Commission. Ilang gikahinabi ang warden ug gisusi ang kahimtang sa mga piniriso.

Inisyal nga nabantayan sa DILG ang hilabihang kadaghan nga mga piniriso sa pasili- dad, nga misobra na sa 2,700.

Wala mahisguti ang posibleng pag-turnover sa pasilidad ngadto sa BJMP.

Wa pay rekomendasyon ang DILG labot sa ilang mga na-obserbahan sa prisohan.

Gitug-an sa CPDRC OIC, nga si Bobby Legaspi, nga lakip sa mga natuki sa imbestigasyon ang nakontrobersiyal nga Greyhound Operation sa miaging semana, diin gipahubo ang mga piniriso.

Sa laing bahin, subay sa mas gipahugtan nga seguridad sa CPDRC, daghang mga butang ang dili na mahimong dalhon sa sulod o itunol ngadto sa mga piniriso, bisan paman og kabahin kini sa inadlaw nilang panginahanglan sama sa tubig.

Usa ka dalaw ang nireklamo human nga wala siya tugoti sa mga nagbantay nga pulis nga mapasulod ang gidala niya nga usa ka gallon sa mineral water, nga alang sa iyang 58-anyos nga amahan, nga napriso tungod sa drugas.

Nanalipod ang CPDRC sa maong lakang.

Matod ni Legaspi, paagi kini aron kapugngan ang pagpasulod sa drugas, particular na ang shabu nga isagol sa tubig ug inig abot sa sulod paughon aron maoy mahingos sa mga piniriso.

Gawas sa mineral water, lakip sa mga gidili na nga ipasulod sa CPDRC ang delata, rubbing alcohol, gapas, mabu-ak nga plato, stainless nga kutsara ug tinidor, toothpaste tube ug suka. /