SUSPEKSA KAWAT HIMUONG SAKSI

Usa sa mga suspek sa kawat sa buhatan sa usa ka Koryano himuong saksi human kini nitahan ug niuli sa kwarta, ingon man nangayo og pasaylo.

Di mominos sa P207,000 cash ang nahanaw sa vault sa Koryano nga negosyante human giunay og kawat sa iyang mga kawani nga gilangkuban sa iyang gisaligan ug gwardiya sa kompanya sa Brgy. Alangalang, dakbayan sa Mandaue niadtong Marso 6 sa gabii.

Nasikop na hinuon ang mga suspek atol sa hot-pursuit sa kapulisan niadtong Martes.

Matod ni PCInsp. Mercy Villaro, public information officer sa Mandaue City Police Office (MCPO), ang mga suspek sa pagpangawat tulo ka kawani sa Gangnam Souvenirs Inc. nga giila nga sila si Romeo Dumiande, 33, guwardiya, taga Cubacub; Jun Mark Sareno, kawani; ug Joel Rufo, sinaligan sa ilang amo.

Sumala pa ni Villaro nga nangayo og pakitabang sa kapulisan si Jun Young Kin, Korean national nga general manager sa kompanyang gitrabahuan sa tulo human masuta nga nahanaw ang cash sa de yawe nga vault sud sa ilang buhatan sa HPS building sa maong dapit.

Nahitabo ang pagpangawat mga alas 11:30 sa gabii ug gituohan nga ang mastermind mao si Rufo.

Sigun ni Villaro nga unang nasikop sa kapulisan si Dumiande nga giingong gihatagan ni Rufo og P62,000 nga bahin nga gikatakdang iuli sa gwardiya sa iyang amo.

Ikaduhang nasikop mao si Sareno ug ikatulo mao si Rufo.

“Before niadto sa pulis si Sareno, niadto siyas Koryano [ Jun Young Kin] ug nangayo og pasaylo sa Koryano ug niuli sa kwarta nga gihatag ni Rufo niya nga mga P50,000,” ni Villaro sa Superbalita Cebu.

Matod ni Villaro, tungod sa gibuhat ni Sareno, imbes nga iapil siya sa kaso, himuon siyang witness batok ni Rufo ug Dumiande.

Si Villaro niingon nga niangkon si Rufo sa pagpangawat ug iuli na unta niini ang gikawat nga kwarta sa iyang amo apan wa pa kini makompleto.

“Si Rufo as trustee, naggunit ni siya og yawi before kay key operated man ang vault unya nagpa-duplicate siya sa key one time,” ni Villaro sa dihang gipanguta nganung nakuha sa mga suspek ang maong salapi.

Si Rufo ug Dumiande gipasakaan na og kasong qualified theft kagahapon sa hapon, sigun ni Villaro.

Samtang ang Koryano nga general manager gipangayuan og kopya sa CCTV footage sa ilang establisamento aron makita ang mga panghitabo sa pagpangawat. /