Ilegal nga mga manindahay may maghuwat nga multa
nibahad si Mandaue City Mayor luigi Quisumbing nga makabayad og citation ticket ang mga iligal nga naninda sa dalan Ceniza ug Gomez kon mobalik og tukod sa ilang stalls sa dapit.
Niadtong Martes, gipangguba sa city legal office ug Traffic Enforcement Agency of Mandaue (TEAM) ang mga iligal nga stalls sa dapit human nihupas na ang gilugway sa mayor nga kutob na lang niadtong Lunes nga boluntaryong makaguba sa ilang mga barong-barong nga tindahan ang mga iligal nga naninda.
Human sa demolisyon, nagpasalamat ang mayor ngadto sa mga tindera nga bisan apektado sa demolisyon apan boluntaryo gihapong nga niguba sa ilang mga stall. pinaagi Sa iyang Facebook post “I promised them I would try to find a way to legalize their
status as vendors but told them that we will no longer be allowing encroachment on sidewalks and roads in Mandaue City,” ni Quisumbing sa iyang Facebook post.
Matod sa mayor nga ilang gibuhat mao ang pagpalapad sa karsada ug pagbalik sa sidewalk aron nga kini kaagian sa mga pedestrian.
“This is part of a wider effort to return the pavements and sidewalks to the pedestrians for their safety. Given the traffic problem, the City is currently facing, we can no longer afford to close down roads or allow any more hinderances,” sumala pa niini.
Ang lakang sa city hall gihimo usab human nga ang kapin sa 1,500 ka mga lehitimong naninda sa bag-ong merkado luyo sa sports complex, nitiyabaw ngadto ni Quisumbing atol sa ilang panagtagbo sa milabayng buwan nga “gilangaw” na ilang paninda ug apektado na ilang kita tungod kay wa nay mamalit sa ila tungod sa presensiya sa iligal nga naninda nga susamag presyo sa ilang mga baligya.
Sigun sa mayor nga kon mobalik og tukod ang mga iligal nga naninda sa dalan Ceniza ug Gomez mga duol sa daang merkado, isyuhan na kini ug citation ticket.
Sa unang opensa, sagpaon sa administratibong multa ang tag-iya sa establisamento o tindera og P500 nga multa; P1,000 sa ikaduhang opensa; ug pag-embargo sa mga baligya, sakyanan, motor, traysikol, traysikad ug demolisyon sa stall ug multa nga P1,500 ang matagamtaman sa ikatulong opensa.
Pagkapriso sud sa 15 ka adlaw o parehong embargo, demolisyon, multa ug pagkapriso ang ipahamtang sa nasakpan nga pabiling iligal nga naninda sa ikatulong higayon sa dapit. /