Taga simbahan maoy mosaksi

Nunot niining pagbalik sa Operation Tokhang sa Philippine National Police (PNP) ug aron paghanaw sa mga pagduda ug katahap nga giabusuhan sa kapulisan ang ilang gahum pinaagi sa pagpatay sa mga drug personalities atol sa drug operations, giimbitahan sa kapulisan ang simbahan nga magpadala og reprsentante atol sa drug operations.

Sa dihang gilusad ang Operation Tokhang sa paglingkod ni Presidente Rodrigo Duterte aron puhagon ang illegal drug trade, daghan ang mga mireklamo labi pa ang mga lider sa Simbahang Katoliko gumikan kay daghan ang mga napatay atol sa police operations. Ilang gibasol si Duterte gumikan kay iyang gidasig o gimanduan ba kaha ang kapulisan nga patyon gyud ang suspek.

Apan ang version sa kapulisan nga misukol ang mga suspek atol sa operasyon hinungdan nga napugos sila sa pagpusil. Mas maayo nga silay maka-una kay sa silay maoy ma-unhan. Apan gawas sa mga napatay sa mga lihitimong operasyon, aduna usay mga napatay sa mga motorcycle riding in tandem unya naka-maskara ang mga suspetsado. Gidudahan gihapon nga mga pulis ra gihapon ang naghimo niini. Nahulog ang maong mga kaso nga "death under investigation."

Nagpili pa karon ang PNP nga maglangkob sa bag-ong umulon nga Drug Enforcement Unit nga langkuban sa mga tarung og ligdong nga mga pulis. Mas maayo kining maong plano nga pakuyugan og mga pari o pastor ang matag operasyon sa kapulisan aron mawala kining mga pagduda sa extra judicial killings (EJK) kay sila man ang kusog kaayong mosaway niini.

Apan ang reaksiyon sa taga simbahan nga dili sila mokuyog sa police operations. Ambot dili ko makasabot aning mga lider sa simbahan. Maayo mosaway ug yawyaw unya dili mopakita og kooperasyon. Daghan bitaw nang mga misurender nga mga drug addicts apan wala gyud silay gihimo sa pagtabang niini. Wala sila motabang sa pagtukod og mga drug rehabilitation centers aron masalbar pa kining nagumon sa illegal drugas.