Espesyal nga selda

Dunay espeyal nga selda nga diskubrehan ang Philippine Drug Enforcement Agency (PDEA) sulod sa Cebu Provincial Detention and Rehabilitation Center (CPDRC) atol sa gipahigayong kinalit nga Greyhound Operation sulod sa maong bilangguan sa niaging semana. Kini maoy nakakawat sa atensiyon sa PDEA kinsa matod pa nga naglisod sila og agi sa hallway sa infirmary sa prisohan tungod kay nakababag kini sa agianan sa operatiba atol sa pagronda.

Ug nadiskobrehan usab nga ang piniriso nga nagpuyo sa maong selda nga nag-atubang og kaso nga may kalambigitan sa gidiling drugas igsuon sa usa ka nurse nga naa madestino ra usab sa nahisgutang prisohan.

Dunay special treatment nga nahitabo sa CPDRC tungod kay lig-on man og kapit ang maong piniriso. Pero lisod tuohan nga ang nurse ray iyang gisandigan kay unsa may gahum niini nga makapatukod man og kaugalingon nilang selda.

Sa ato pa, sabtunon nga dunay dakong opisyal diha sa CPDRC ang nagpaluyo niini.

Salikwaot paminawon nga samtang ang ubang mga piniriso naghuot sa ilang mga selda, aniay pinanggang piniriso nga haruhay. Tiaw mo bay adunay hospital bed nga komportabli kaayong higdaan ug may electric fan ug radyo pa.

Ug kon nganong nahimo ni, kini maoy angay susihon ni Cebu Governor Hilario Davide III kay di kalikayan ang pagduda nga dunay nakadawat og payola sa mga nagdumala sa CPDRC.

Si Roberto Legaspi, ang officer-in-charge, mipadayag nga posibling may pagtugot kini sa gitaktak nga jail warden nga si Dr. Gil Macato ug sa ubang mga personnel.

Maayo siguro nga tubagon ug moluwat usab og pamahayag si Macato kalabot niini aron pagdepensa sa iyang kaugalingon kay sukad ra ba sa iyang pagkataktak wala na ta makadungog sa iyang mga pamahayag. Kini maoy tukmang higayon nga malimpyohan ang iyang pangalan.