You mean everything to me
Sa misunod nga mga adlaw, kanunay kong makita si Marlou nga maghinuktok sa among lawn panahon sa kagabhion. Igo na lang kong manghupaw nga magtan-aw niya tungod sa kaluoy ko niya. Samtang si Marlon morag wa na gyuy kadasig nga makig-estorya nako.
“Please tell me sa unsa man nga naa ron sa imong hunahuna, Marlon. Nahasol ko ani, uy!”
Gitan-aw kog dugay ni Marlon. Seryuso kaayo siya.
“Miabot na ang time nga mamili ko ninyong duha ni Marlene, Kat. I’m sorry.”
Ang gisulti ni Marlon maoy usa ka dakong reyalidad nga si Marlene ng labaw niyang gihigugma. Gusto kong mohilak apan way luha nga miagas sa akong mga mata. “So, wa na ta, Marlon?” Mitando si Marlon. Unya nananghid siya nako nga mopauli na. Igo ko lang siyang gisundan sa akong panan-aw hangtod nga nakagawas na siya sa among sala. Gisakitan ko sa among panagbuwag ni Marlon. Apan wa gyuy luha nga migawas sa akong mga mata.
Milabay ang mga adlaw. Dali ra kong naka- move on. Dali ra kong nakadawat sa nahitabo sa among relationship ni Marlon. Nasuta ko sa akong kaugalingon nga wa diay nako higugmaa pag-ayo si Marlon.
Usa ka gabii, giduol ko si Marlou nga naglingkod sa swing sa among lawn. Mitindog siya ug akoy iyang gipalingkod sa swing. Gitabyugni Marlou og hinay ang swing.
“Ang imong Papa pa ba gihapon ang imong gihunahuna, Mar?”
“Wa na ko maghunahuna niya, Kat. Nahasol lang ko sa gibati ko nimo.”
“H-Ha?” Nakalitan ko.
“Dugay na, Kat, nga nakagusto ko nimo. Frankly, you mean everything to me.”
Mitindog ko. Wa koy tingog nga mibiya kang Marlou. Wa ko masuko niya apan nahasol ko. Dugay kong nakatulog niadtong gabhiona. Pagka ugma, puwerte nakong lipaya kay nagkuyog sila si Mama ug Papa sa pagpauli. Nakagakos ko nila. Malipayon sab silang migakos nako.
“Nagkasabot mi si Papa mo, Katrina, nga mag-uli.”
“Tinuod na, Kat. Gusto namo ni Mama mo nga matibuok pagbalik ang atong pamilya.”
Nakahilak ko sa kalipay. Nakahilak sab sila si Papa ug Mama sa kalipay. Samtang si Marlou, malipayong nagtan-aw nako. Gipahiyoman ko siya. Para nako, di lisod higugmaon si Marlou. (KATAPUSAN)