TAMBAGI KO, NOY KULAS

Dear Noy Kulas, Itago lang ko sa ngan nga Corny. Fit nako ang akong alyas kay ingon sa akong mga amiga, corny kuno ko pagkatawo. Unya sala diay nako nga ingon ana ko?

Mao tingali ni ang rason nganong hangtod karon wa koy uyab. Naa koy napaangkan ug gisuportahan nako ang bata pero di nako uyab ang mama, dinala ra sa among kahubog mao nimabdos siya. Ang amoa dala ra to sa among nainom ug pagkahuman, ang resulta nimabdos siya ug ako ang amahan sa bata. Karon, naa na siyay uyab ug friends gihapon mi.

Ingon niya, usbon nako ang akong batasan nga corny kay di kuno ganahan ang mga babaye. Di kay siya ra ang nisulti ana nako, daghan na. Emotero ko nga pagkatawo mao tingali nga ingnon kong corny. Noy, unsa may imong ikatambag nako? Mausab pa kaha ko? Tinuod tingali kay di lang kay usa ra ang nisulti.

CORNY Corny,

Kon ang kanang pagka emotero nimo ang ilang pagpasabot, natural na nga reaksyon sa mga babaye. Kon maghilak hilak or emotional ka, bati na tan-awon alang sa kadaghanan sa mga babaye kay kitang mga lalake, macho ang imahe nato, di palahilak o emotional. Strong ang atoang personalidad nga gipaabot sa mga babaye.

Mga babaye magpaabot nga ikaw kahibawo modepensa niya kon gikinahanglan ka nga mobarog alang niya. Iya kang “knight with a shining armor,” lig-on, di matarog, isog. Okay ra nang mag- emote ka sa husto nga higayon, di kay pirme ka na lang nga ingon niana. Basin gamay lang nga estorya, drama na ang imong reaction.

Pangutana og mga higala o obserbahi sila ingon man ang imong kaugalingon aron makapanamin ka sa imong kaugalingon. Makakuha kag ideya kon unsay angay mong usbon. Kana kon bukas ka sa pag-usab sa imong kaugalingon.

NOY KULAS