Si Tisay Setinta

Felixberto A. Esclamado, Jr. Saac II, Mactan, Lapu-Lapu City, Cebu

Nalingaw og pindotsi Pedencio sa iyang selpon diha sa Plaza Independencia. Nagpaabot siya sa iyang ‘textmate’ nga si Tisay. Bayinte-singko anyos na siya, apan wa pa gayud kini makaagi og panguyab pinaagi sa personal nga pangurso. Sa laktod, kulhanon siya. Mangurog man siya kon motapad og babaye. Mao nga sa selpon na lang niya ipaagi ang nag-uros-uros niyang gugma sa babaye.

Pinaagi sa selpon iyang napagawas ang tanan niyang gibati ngadtong Tisay, bag-o niyang textmate nga karon gustong makigkita kaniya. Miaslom ang iyang dagway dihang mi-replay si Tisay sa mga ‘text message’ ni Pedencio. Nagpaila si Tisay kang Pedencio nga siya si Tisay Setinta. Senior citizen na tingali ni si Tisay, matod ni Pedencio sa hilom. Nagduhaduha si Pedencio nga motunga sa ilang sabot tungod tungod kay kataw-an lang siya sa iyang mga higala nga tiguwang ang iyang uyab.

Usa na ka semana ang relasyon nilang Tisay ug Pedencio, mao nga nakahukom sila nga magkita ning hapuna. Bisan supak sa iyang kabubut-on tungod kay setinta na man diay si Tisay.

Mao nga nakahukom siya nga makigkita kang Tisoy, suod niyang higala aron makigbayloay og textmate. May textmate na sab si Tisoy sulod sa lima ka adlaw, si Margarita. Wa maglangay si Pedencio. Iyang giteksan si Tisoy nga magkita sila sa Plaza Independencia.

“Bay Pedencio, nganong makigbaylo ka man nako og textmate? Basin og magmahay ka ning tanan,” matod ni Tisoy. “Unsa may hinungdan nga tisay man kaha nang bayhana? Basig kaliwat nag Katsila!

“Dili ko magmahay kay ako ning kagustohan,” tubag ni Pedencio. Wa siya motugan sa gituhoan niyang pagka tawo ni Tisay Setinta. Gipatuo niya si Tisoy nga batan-on pa si Tisay.

“Di lang ko, uy!” balibad ni Tisoy. “Basig magmahay ka.”

“Di lagi ko magmahay!” daling tubag ni Pedencio ug mikuha kinig tibuok 500 pesos aron ihatag kang Tisoy, aron mosugot nga magbaylo silag textmate. Misugot si Tisoy.

Nagteksanay sila si Tisay ug Tisoy ug kadali ra silang nagkasuod. Nagkasabot sila nga magkita sa Plaza Indepencia. Ingon man sila si Pedencio ug Margarita nga nagkasabot nga magkita sa Plaza Indepencia.

Taudtaod gyud sila si Pedencio ug Tisoy nga nagpaabot sa ilang mga text-uyab. Unya may nakita si Pedencio nga matahom nga babaye (daw kaliwat og Katsila). Angayan kaayo ang babaye sa gisul-ob niining blawos nga pula nga giparesan og skinny jeans nga puti. May kuyog kining tiguwang nga babaye.

Daling miduol si Pedencio sa batan-ong babaye aron himamaton. Dako iyang pagtuo nga si Margarita kini. “Ikaw si Margarita, Miss?” matod ni Pedencio.

“Dili, uy!” tubag sa guwapang babaye. “Kining akong kuyog maoy Margarita, akong Lola. Ingon siya uyab na man kuno sila si Pedencio.”

“Kinsa man diay ka?” ni Pedencio.

“Ako si Tisay Setinta,” matod sa batan-ong babaye. Ang Setinta akong apelyido. Magkita sab mi ni Tisoy ron. Uyab na man mi ni Tisoy.”

“Unswaaa? Susmaryusep!” Nahiuknol si Pedencio nga midali pagsibat aron makalikay kang Margarita nga mao man hinuon ang Senior Citizen. “Mag-usab pag layog!” singgaak ni Pedencio sa iyang kaugalingon nga nagkaanam og kalayo gikan sa nahimuta-ngan nilang Tisay ug Margarita. Milingi siya ug nakita niya si Tisoy nga nag-agbay kang Tisay.