19 KA MGA DRUGLORD GI-MONITOR
Sagad naa sa Sugbo nag-operate: PDEA
Human masikop si Marwin Abelgas, kinsa lider sa Abelgas drug group ug giisip nga usa sa high value target sa Philippine Drug Enforcement Agency (PDEA) 7, gimonitor karon sa ahensiya ang nahabiling 19 ka mga drug lord sa Central Visayas diin kasagaran niini anaa nag- operate sa Sugbo.
Matod ni PDEA 7 Director Yogi Filemon Ruiz nga 20 ka mga drug lords o high value
targets ang ilang gitutukan karon sa rehiyon.
Tungod kay nasikop na si Abelgas, ang nahabiling 19 mao ang gitutukan nila diin tulo niini anaa sa lalawigan sa Bohol.
Gipasabot ni Ruiz nga ilang giisip nga HVT kadtong mga drug
personality nga nag- supply sa mga drug pusher ug makabaligya og di mominus sa usa ka kilo
sa shabu ang semana.
“Considering ang Cebu is the center of economy sa Region 7, not only Region 7 but sa Visayas ug Mindanao. Ang atong mga ports naay capability to almost cater ports sa Visayas and Mindanao. So mao nay gi take-advantage sa atong mga sydicates, ang transshipment points sa Cebu,” si Ruiz sa pasangil ni Presidente Rodrigo Duterte nga ang Cebu mao ang numero uno sa drugas sa nasod.
Giangkon hinuon niya nga nigara ang mga drug lords sa ilang ilegal nga negosyo human gihunong ang kalambigitan sa kapulisan sa kampanya batok drugas.
Apan karon, balik sa HVT ang mga operasyon nila.
Gidasig usab ni Ruiz ang manlalaban ni Franz Sabalones nga kon gigamit lang ang ngalan sa iyang kliyente sa mga bag-ong niduwa sa ilegal nga negosyo, mohatag kini og ngan ngadto sa PDEA 7.
“Kon kahibaw siya kinsa nang new players, gisulti ta niya sa atoa. Nganong makaingon man nga new players? Kinsa mana ilang giingon nga new
players ilang pasabot?,” si Ruiz kinsa nahinabi sa tigbalita.
Dugang niya nga nahuman na ilang trabaho kang Sabalones ug adto na motubag ang kampo ni Sabalones sa korte human gipugngan sa korte ang P76 milyones nga asset niini.
Gitubag usab ni Ruiz nga nagpabiling aduna’y nagtuyok nga drugas sa lungsod sa San Fernando diin gikan si Sabalones. /