WAY GIKIDNAP SA NAGA

Kapulisan sa dakbayan sa Naga nanawagan karon sa taga Naga nga mohunong na sa pag- post sa social media sa walay klarong taho sama sa pagpanagit o kidnaping.

Nakapaalarma ug nakahadlok sa mga lumolupyo, busa mahimong mapasakaan og kaso kadtong mga responsabli sa pag- post.

Si Supt. Gregorio Galsim niingon nga adunay duha ka mga tawo na ang nipahibawo sa ilang Facebook account labot sa kidnapping sa ilang siyudad.

Samtang, nasubay na sa kapulisan ang mga responsabli sa pagbutang sa Facebook ug ila kining giawhag sa pag- report sa ilang buhatan.

Apan atol usab sa ilang inbestigasyon ang maong tawo miingon nga di tinuod ang ilang gi- post ug igo lang usab sila nakadungog sa maong taho labot sa hitabo.

Giklaro ni Galsim nga isip hepe sa City of Naga Police Station walay nahitabong pagpanagit sa ilang siyudad.

“Wala pa gyuy nag report diri nga tinuod, wala man pud ta gahandom. Kami amo naman gi- monitor kung kinsa gyud ang biktima unya wala gyu'y ni- report formally diri nga naay kidnap. Puro raman according to,” matod ni Supt. Galsim.

Gitambagan ni Galsim kadtong mga nag- post sa ilang Facebook nga mangayog pasaylo pinaagi gihapon sa social media ug ilang klarohon nga dakong bakak ang ilang gipahibawo.

Hinuon, giawhag ni Galsim ang taga Naga nga dili gihapon mokompyansa kon aduna silay mamatikdan nga lahi ang linihukan sa pag- report gilayon ngadto sa ilang buhatan ug dili kay modayo' og post sa social media.

Matod ni Galsim nga sa pagkakaron, gidoble nila ang ilang lihok pagsiguro nga luwas ang taga dakbayan sa Naga.