AGIAN SA TRAYSIKOL IBALHIN
Gitun-an karon sa Traffic Enforcement Agency of Mandaue (TEAM) ang posibilidad nga ibalhin ang mga agianan sa trasikol sa dakbayan luyo sa city hall.
Kini human nga nirekamo na ang public library sa kasaba sa nagdagang mga trasikol sa may dalan Gomez diin nahimutang ang library sa dakbayan.
“Ang library nagreklamo na nato kay naay daghan nga nagtuon, niya saba bitaw. So atong ibahin sa luyo sa traysikol, atong ibalhin sa karaan nila nga nahimutangan,” ni Glenn Antigua sa Superbalita Cebu.
Dugang niya nga kini maoy usa sa mga plano sanglit buot sa kagamhanan nga himuong
“pedestrian friendly” ang duol sa city hall sa dakbayan.
Mao sad kini ang rason nga wa na kaayo paagi-i og PUJ sa kagamhanan ang atubangan sa city hall.
Niimplementar ang Team og rerouting sa mga jeep nga mopaingon sa Parkmall ug merkado, ang mga jeep nga kini maoy ilang destinasyon sagad mag-agian sa city hall.
Kini maoy hinungdan nga ang mga PUJ gikan sa Liloan paingon sa Mandaue padiretsohon na sa Maguikay flyover ug palikuon sa L. Jaime st., Sitio Marfa, Brgy. Bakilid usa sila mopaingon sa ilang destinasyon.
“Kining city hall himuon ning pedestrian friendly so amo sang gituyo nga kwaon namu ang PUJ nga murag minusan ang PUJ nga moagi. Sa traysikol kay ang traysikol atong i- transfer kay atong nakita nga traysikol samok kaayo sa library,” ni Antigua.
Dako usab ang pasalamat ni Antigua nga humana gipangguba sa mga iligal nga stall sa daang merkado tungod kay naluagan na ang mga dalan nga maoy mahimong alternatibong rota sa mga jeep nga paingon sa Parkmall.
“Nagpasalamat na gani ta kay napadak-an na ang karsada sa daang merkado, nindot na agian. Nahawan nga road sa daang merkado is mao na siya ang
alternative road paingon sa Parkmall kay di naman paagian dapit sa plaza sa city hall og mga sakyanan,” dugang niya.
Kon epektibo ang maong tahas, ang mga traysikol didto na magpasakay ug mopakanaug og pasahero sa dalan Zamora, luyo sa city hall. /