DOE, PNP gidayeg sa consumer group

Usa ka consumer group nidayeg sa mga awtoridad sa kalampusan sa ilang operasyon sa pagronda batok sa illegal refillers a butane canisters nga naghatag og kakuyaw sa sunog.

Matod sa National Coalition for Filipino Consumers (NCFC) nga ang ronda sa Department of Energy – 7 (DOE-7), Provincial Disaster Risk Reduction Management Office ug Criminal Investigation and Detection Group niadtong Pebrero 24 sa usa ka outlet sa Uldog st. barangay San Roque, Talisay City niresulta sa pagkasikop sa walo ka mga tawo.

Wa hinuon masikop ang giingong tag-iya sa refilling station kay wa diha atol sa ronda.

Nasakmit sa raid mao ang 11,000 ka butane canisters, diin 8,500 niini illegal nga gi- refilled og liquefied petroleum gas (LPG).

Ang butane canisters wa gidesinyo aron sudlan og LPG, nga sambog sa butane ug propane.

Ang pagbuto sa ilegal nga refilled canisters maoy gibasol sa daghang mga sunog, di lang sa Sugbo, kon di sa ubang mga dapit sa nasod.

Ang Ilegal nga gi-refill nga canisters gigamit sa pagluto tungod kay mas barato, “just like cooking gas sold in retail,” matod sa NCFC.

Matod niini nga ang refilled canisters hulga sa komunidad.

“It is like going after the small-fry, the tsinelas wearing peddlers, while the big fishes, the suppliers go scotfree, laughing their way to the bank,” matod ni Ben Cyrus G. Ellorin, kanhi journalist nga nahimong NCFC safety campaigner, sa ilang pamahayag.

Ilang gidayeg si Dept. of Energy – 7 Director Antonio Labios ug DOE-7 legal officer Russ Mark Gamallo sa ilang paninguha sa pagpatuman sa DOE Order 01-0001 kun Liquefied Petroleum Gas Rule, nga nagdili sa retail sa LPG gamit ang butane canisters.

Ila usab nga giawhag ang mga awtoridad sa pagsulbad sa gamot sa suliran nga mao ang dagkong mga negusyante og LPG nga niapil sa ilegal nga negusyo isip supplier./