Isipon nga dakong hagit

Inay nga mo-ulbo ang kaspa sa atong mga lokal nga opisyal kabahin sa pamahayag ni Presidente Rodrigo Duterte nga nag-una ang Sugbo sa problema sa drugas, isipon nila kining dakong hagit aron maningkamot sa pagsulbad ning maong problema sa illegal nga drugas.

Atol sa iyang pagpamulong sa national convention sa mga sakop sa Philippine Councilors League (PCL) niadtong Miyerkules didto sa kauluhan, gibutyag sa Presidente nga nag-una ang Sugbo sa drug abuse diin moabot ngadto sa 60 ngadto sa 70 percent ang mga drug users.

Nahingangha si Gov. Junjun Davide ug si Philippine Drug Enforcement Agency (PDEA 7) regional director Yogi Felimon Ruiz. Gikuwestiyon pa ni Davide kon diin gikan sa Presidente ang maong inpormasyon ug gusto siyang masayod kon kinsa ang naghatag niini. Samtang si Ruiz mi-ingon nga outdated o karaan na ang maong impormasyon.

Kining mga reaksiyon nila ni Davide ug Ruiz morag mogawas man nga ilang gikuwestiyon ang awtoridad sa Presidente. Dili man siguro magpataka og yawit ang Presidente kon wala siyay igong basihanan ug kapasikaran. Lapad ang access sa inpormasyon sa Presidente busa dili kita angay nga mokuwestiyonon sa iyang awtoridad. Daghang nga intelligence units nga nag-operate ug mohatag og impormasyon sa Presidente. Una, niini gibutyag usab sa Presidente ang presensiya sa Korean Mafia nga naglihok dinhi sa Sugbo nga diin gipanghimakak usab sa atong mga lokal nga opisyal.

Ang angay nga himuon nila ni Davide ug Ruiz mao ang pagdawat niining maong pamahayag ug isipon kini nila nga dakong hagit aron ipadayon ug mapadayon ang mga lakang sa pagsumpo ning nag-unang problema sa atong katilingban. Dili lang nato isalig ang tanan sa law enforcement kon dili motabang tang tanan apil na ang komunidad aron masumpo ang pagkuyanap ning maong problema.

Daghang nga intelligence units nga nag-operate ug mohatag og inpormasyon sa Presidente.