Pamulitika

Nalutsan og mga warrant of arrest ang duha ka mga barangay kapitan nga gikiha sa Siyudad tungod sa wa pag-uli sa husttong panahon sa ilang mga sakyanan nga gitugyan kanila sa administrasyon ni kanhi mayor Mike Rama. Wa gipang-uli dayon sa mao nga mga barangay official ang mga sakyanan human kini gi-recall alang sa imbentaryo. Pito ra hinuon sa mga opisyal ang gipangkiha.

Bisan pito ra, klaro nga dunay bulok pulitika ang tanan sukad pa sa sinugdan. Kay ang pagpamawi di man tungod sa imbentaryo, kon di pamulitika.

Kon wa pay bulok sa pulitika, human gipang-imbentaryo ang mga sakyanan, gibalik unta nila ngadto sa mga barangay kapitan nga gitugyanan niini. Wa man mahibalik. Toa sa ilang mga kaalyado gitugyan ang mga sakyanan. Hinuon, mao nay giingon weder-weder lang. Apan kon tinuoray nga dunay dakong suliran ang Siyudad, nganong gudkon pa man ang mao nga mga kapitan? Nahug na gud ni nga wa na kinahanglana kay ila nang gipang-uli ang mga sakyanan. Okay ra unta kon hangtod ning higayuna, naa gihapon kini kanila. Inay makatutok sa daghang mga suliran sa dakbayan, ang panahon makan-an tungod ning mao nga mga kaso.

Unsa man say makuha sa Siyudad ning pagpasaka og kaso batok sa mao nga mga opisyal? Aron lang ba pagpatagam kanila?

Ang labing maayo unta nga buhaton sa usa ka lider nga di tradisyunal nga pulitiko, mao ang pagpakighiuli bisan niadtong labing dako niyang kontra sa pulitika. Kana aron makairog ug mo-function sa iyang mga gimbuhaton ug tahas ang usa ka lider . Kay ang pagdumala sa Siyudad nagkinahanglan og pagtutok kon pukus.

Kaanugon sa buhis sa katawhan kon kini lang pagpanggukod sa mga kaatbang ang tutokan. Mao tingali nga wa makit-i ang grabeng kahimtang sa mga karsada ug drainage sa dakbayan kay nabutaan sa nasobraang pamulitika.