Nag-una sa drug users?

Wa ko mahibulong niining pamahayag ni Presidente Rodrigo Duterte nga ang Sugbo maoy numero uno sa kadaghanon sa mga tiggamitan og gidiling drugas.

Wa baya malilong kanato nga pipila sa nalista sa presidente nga mga drug lord ug drug protektor nagbase o nakat-on sa ilang industriya dinhi sa Sugbo.

Pananglitan, dinhi sa Sugbo nitubo si Jeffrey ‘Jaguar’ Diaz sugod sa paghinapos sa 2010 hangtod nga namatay sa usa ka engkwentro sa kapulisan didto sa kaulohan sa miaging tuig human sa piliay.

Nasayran na karon nga dili lang diay sa Sugbo ang operasyon ni Jaguar. Ang laing namatay sa lain sab nga engkwentro sa kapulisan mao si Rowen ‘Yawa’ Secretaria nga maoy tig-distribute sa Visayas sa supply nga gikan ni Jaguar.

Gani, dihang nasugamak si Jaguar sa kapulisan, didto kini nahitabo sa kaulohan diin nag-andam na siya sa iyang expansion.

Nakaila sab kita ni Kerwin Espinosa, ang bantugang drug lord didto sa Albuera, Leyte. Nagsugod kini siya sa pagka drug lord dinhi sa Sugbo uban sa sindikato ni Jaguar.

Dakong balita sab ang nahitabo sa iyang amahan nga si Albuera Mayor Rolando ‘Daddy Onik’ Espinosa.

Kahinumdoman, nahimong isyo si kanhi mayor Mike Rama dihang napatik sa mga mantalaan, lakip na dinhi sa Superbalita, ang hulagway nga iyang gihurar isip kandidato sa UNA kini si Onik.

Niadtong tungora, wa nay partido nga modawat kang Onik tungod sa pagkailado sa mga Espinosa nga mga drug lord sa Leyte. Ang UNA lang ang nidawat ubos sa liderato ni Rama nga maoy regional coordinator.

Atong nasabtan nga kining maong koneksyon maoy nakapalambit ni Rama sa mga Espinosa ug nisangpot kini sa pagngalan kaniya sa presidente isip usa ka drug lord protector.

Si Rama mismo ang niingon nga, matod pa ni Sal Panelo, abogado sa presidente, nga kining maong hulagway hinungdan nga naapil siya sa listahan.

TAX EVADER

Way lipod-lipod si Presidente Duterte nga manghimaraot ug migukod sa mga tax evader. Sa national level, ginganlan niya kining Mighty Cigarette nga grabing nagpayuhot og mga pekeng sigarilyo.

Dinhi sa Sugbo, duna say hugot nga kampanya si Mayor Tomas Osmeña batok sa wala mobayad og saktong buhis sa Syudad sa Sugbo.

Wa lang ko makasabot nganong dunay mga tigsuporta ni Duterte, gani eyes and ears pa kuno, nga mangasuko man nga gigukod ang mga negusyanteng wa mobayad sa saktong buhis. “Bully” kuno ang mayor.

Tingale, angayang panaminan nila ang giingon ni Duterte nga silang Osmeña ug ni Adi Sitoy dihang namulong kini sa miaging Marso 2, nga sila mga mayor. “We build cities,” matod pa ni Presidente Duterte.