Don’t ever go
Sa nakita ko kang Mama, morag nagpasabot siya kang Ronnie. Nakita ko sab si Ronnie nga nagduko lang. Morag nawad-an nag kadasig si Ronnie sa kanunay kong pagbalibad sa iyang gugma nako. Apan klaro sa lihok ni Mama nga gidasig niya si Ronnie.
Mipakibo na lang ko sa akong mga abaga dayon kong sulod sa akong kuwarto.
Pagka ugma, nagdungan mig paniudto si Sharma, ang close
friend nako sa eskol. Kanunay ming mag-uban bisan sa pagesnak. Si Sharma ang sumbongan ko sa akong mga problema labi na bahin sa akong lovelife.
“Ayaw paminawa ang mga komentaryo bahin kang Homer, Cresilda.”
Nakahibawo si Sharma nga si Homer ang akong boyfriend. Gitug-anan ko sab siya bahin sa sitwasyon ni Homer.
“Maoy sunda ang unsa man nga pinitik sa imong kasingkasing, Cres.”
“I love him, Shar. Pero morag husto sab si Ronnie. Bisan matambalan si Homer sa Rehabilitation Center, may posibilidad gihapon nga mobalik siya sa iyang bisyo. Sa akong nahibaw-an, lisod kini kabiyaan sa hingpit kon magumon na gyud ani.”
“Kon tinuod kang love ni Homer, maningkamot siya nga mabiyaan gyud ang shabu. Kay ngano, nakahunahuna ka ba diay sa pagsugot kang Ronnie, Cres?”
Wa ko motingog. Naluoy na man gud ko kang Ronnie. Iyang gipakita nako nga tinudanay gyud ang iyang pagmahal nako. Ug si Mama ug si Papa sab, kanunay masuko nako tungod sa pagpakigrelasyon ko kang Homer.
“Sa imong pagtuo, Shar, duna kahay kalinaw ang akong pagminahalay ni Homer? Gisultihan na tika nga dakong supak sila si Papa ug Mama niya?”
Mitan-aw og dugay si Sharma nako. Nagkatinan-away mig dugay. Nanghupaw si Sharma. Tingali, gibati sab niya ang kabug-at nga akong gibati sa problema ko sa akong lovelife.
“Ang ako lang ikasulti nimo, Cres, ayaw diha-diha i- go ang imong love kang Homer. Di ba ang duha ka managhigugmaay ra man ang magkasinabtanay bisag nasuko kanila ang kalibotan?”
Nahikatawa ko sa dialogue ni Sharma.
“Wow! Kabug-at gud ana, Sharma?”
Mikatawa na lang sab si Sharma.
Pagka Domingo, giagni ko nila ni Mama ug Papa nga magbeach. Wa ko makabalibad. Kauban sab diay namo si Ronnie. Gusto gyud nila ni Mama ug Papa nga magkasuod gyud mi pag-ayo si Ronnie. (SUMPAYAN)