Habalhabal
Bisan asa ka nga suok karon sa Sugbo, imposibleng way habalhabal. Ingon na niana kagrabe ang kadaghan sa mga habalhabal sa atong kadalanan. Kaniadto wa ko magtuo nga ang habalhabal moabot sa pag- operate sa dan Colon tungod sa kadaghan sa mga PUJ sa dapit, 24 oras.
Ang pagdagsang sa habalhabal dunay kaayuhan ug duna say kadautan nga dala. Naghimo kining sayon sa pagbiyahe sa bisan asang dapit sa Sugbo, sayo nga pag-abot sa mga appointment o trabaho taliwa sa kahimtang sa trapiko.
Apan kon duna may kaayuhan, duna usab ni kadautan. Ang unang kadaut nga dala sa mga habalahabal mao ang kakuyaw na sa atong mga karsada. Daghan ani nila magpataka lang sa pagpadagan, sukwahi sa nabutang sa ilang mga uniform nga dunay pulong “safe.”
Kaniadtong magtungasan pa ko sa Willy’s, usa ang habalhabal sa mga sakyanan nga mokalit lang sa pagbabag sa agianan sa mga siklista samtang magtungas. Mohunong nga way warning. Kinsa ba nga siklista ang di maglagot nga maputol ang imong momentum sa pagtungas?
Kapila na ko hapit maigo sa habalhabal, kansang mga driver magpahaguros lang sa pagpadagan, way paghuna-huna sa kaluwasan niya ug sa uban. Mao ni ang rason nganong daghang aksidente sa motorsiklo.
Kontrolahon
Unta, samtang di pa mahurot sa mga habalhabal ang tanang kadaplinan sa mga karsada, angay na silang i- regulate. Gikinahanglan nga i- professionalize o i level–up ang ilang kahimtang. Labaw sa tanan, tudloan sila og road courtesy ug safety kay kadaghanan ani nila way kalibutan o kon nasayod, nagpabaya.
Diha sa JY Square padung ngadto sa Nivel Hills, grabe ang mga habalhabal drivers. Way tahod sa traffic signs, sama sa no stopping, no loading, unloading ug uban pa. Naay uban nga naa sa mga eskina maghuwat og pasahero.
Naa pay daghan nila mokalit lang sa paglabang sa karsada.
Ordinansa
Unta dunay ipalabang nga ordinansahon nga mag- address niining problema sa habalhabal. Di aron sila papason, kon di kontrahon ang ilang gidaghanon ug butangan og mga regulasyon. Pinaagi niini, di matibahangan og maayo ang kita sa mga PUJ, taxi driver ug mismo nilang habalhabal drivers. Mas daghan, mas gamay ang kita. Daghang kaayuhan ang dala sa pagkontrolar, kana kon dunay kaisog nga moimplementar. Kana maoy dakong pangutana.