MACKY-SADYA SA 1ST BDAY
Nagrosaryo si Madine Buot Sabang samtang nagbati sud sa Labor Room sa usa ka pribado nga tambalanan sa dakbayan sa Sugbo. Nag-ampo siya gamit ang rosary bracelet sa Birhen sa
Regla nga hinatag sa inahan sa iyang hinigugma.
Na-admit siya sa ospital alas 3 sa hapon niadtong Marso 3, 2016.
Sud sa 19 ka oras nagbati si Madine ug gibati na og kabalaka ang iyang doktor nga wala gihapon mogawas ang bata gikan sa iyang sabakan.
Tungod niini, ang iyang doktor nipaandam sa iyang mga ginikanan aron siya mapaubos sa Caesarean Section diin gipapirma na sila og waiver.
“Dugay siya nigawas, maski unsaon nako og utong. Naningkamot ko kay dili ko ganahan magpa-Caesarean, dako ang mabayran unya dugay mawala ang sakit,” pahayag ni Madine sa pakighinabi sa Superbalita Cebu.
Apan human sa pipila ka oras, nadungog ang iyang pag-ampo ug sa iyahang pamilya.
Alas 10:45 sa buntag niadtong Marso 4, 2016, gipakatawo ni Madine ang usa ka himsog nga batang lalake. Nitimbang kini og 6.4 ka libras.
“Paggawas niya gipakugos sa akoa. Hala! Ingon ani diay ang feeling, mura kog kahilakon,” asoy sa 27-anyos nga inahan.
Ang bata gihinganlan ni Madine ug sa iyang hinigugma nga si Joseph Nick og Josef Dennis Neil Nuñez nga may angga nga Macky.
Niadtong Marso 4, 2017 sa panimalay nila ni Madine sa lungsod sa Carmen, amihanang Sugbo, gisaulog ang unang kasumaran sa adlaw nga natawhan ni Macky pinaagi sa Children's Party nga ang tema kay 'Jake and the Never Land Pirates' diin ang ubang mga bisita nga bata kay nanagsul-ob og mga sinina nga sama sa mga pirata.
Si Madine nalipay nga nakaapil sa selebrasyon sa birthday sa iyang anak ang iyang kapares nga si Joseph, 27, nga wa diha sa iyang kiliran dihang iyang gihimugso si Macky sanglit tua kini manarbaho sa nasod sa Oman. Si Madine, kanhi news personality sa Aksyon Bisaya sa TV5, nihulagway ni Baby Macky nga usa ka aktibo ug lihokan nga bata nga liwat ni Joseph.
Siya nanghinaot nga ang iyang anak magtubo nga baskog, buotan ug matinahuron kanila nga mga ginikanan niini ug sa iyang mga apohan. /