WARRIORS GIPAAK SA TIMBERWOLVES
Gimugna ni Andrew Wiggins sa 2nd half ang 20 sa iyang kinatibuk-ang 24 puntos unya napasulod ang nakapadaog nga freethrows sa nahabiling 12.8 segundos aron agakon ang host Minnesota Timberwolves sa kadaugan batok sa Golden State Warriors, 103-102, kagahapon sa National Basketball Association (NBA).
Nitampo og 24 puntos si Karl-Anthony Towns alang sa kadaugan samtang nidugang si Ricky Rubio og 17 puntos ug 13 assists.
Ang Timberwolves mingdaog og unom sa miagi nilang walo ka mga duwa aron isaka ang ilang rekord sa 27-37 ug paamagon ang ilang poruhan nga makakumpayot sa nagkaduol nga playoff .
Ang Warriors, nga natagak sa 52-13 nga rekord, gipangulohan ni Klay Thompson pinaagi sa iyang 30 puntos samtang nidugang og 26 puntos si Stephen Curry.
Sa himatyong segundos, nasipyat si Curry sa iyang itsa nga mao unta’y makapadaog sa Warriors.
Ang Warriors padayong ningkombati nga wala ang lang usa sa labing mga sinaligan nga si Kevin Durant.
Sa nahabiling 29 segundos, nasipyat si Wiggins sa iyang duha ka freethrows nga makahatag unta sa Timberwolves og tulo ka puntos nga labaw.
Sa return play, nakapuntos si Curry og floater aron hatagan ang Warriors og 102-101 nga labaw.
Sa sunod nga posisyon, nakabalik si Wiggins sa freethrow area ug ning higayuna, kalmado na niyang napasulod ang duha ka freethrows aron ituboy ang Timberwolves sa kadaugan.