KNOCKOUT 100%

Mihatag og siyento porsiyentong poruhan si ALA fighter Donnie “Ahas” Nietes nga iyang ma- knockout si Thai Komgrich Nantapech sa ilang inilugay sa bakanteng International Boxing Federation (IBF) world flyweight title karong Abril 29 sa main event sa 40th Pinoy Pride sa Waterfront Hotel sa Lahug, Cebu City.

Sa opisyal nga paglusad sa away sa miaging gabii sa St. Mark’s Hotel, gipasabot sa Filipino longest reigning world champion nga sa iyang pamati, mas kusog siya ning higayuna sa mas bug-at nga timbang.

“100 percent nga ako siyang matumba pero dili lang ko magdali. Na- feel nako nga stronger ko karon, na- feel nako ang akong power,” matod ni Nietes, kinsa adunay 39-1-4, 22KOs nga rekord.

Nagkanayon si Nietes nga malipayon siyang makabalik na sab siya’g away dinhi sa Sugbo ug gusto niyang hatagan ang mga Sugbuanon og impresibong kadaugan.

Tataw sa panagway ni Nietes ang dakong pagsalig nga modaog ning awaya ug mahimong three-division world champion apan nipahimangno ang iyang trainer nga si Edmund Villamor nga dili angayang kumpiyansaan og gamay si Nantapech.

“Dili ni bastabasta nga kontra. Dili gyud ni angayang kumpiyansaan ni Donnie,” batbat ni Villamor.

Hinuon alang kang Villamor, ang agresibo nga estilo ni Nantapech haom sa inawayan ni Nietes maong dako ang iyang pagsalig nga molampos ang garbo sa ALA gym.

“Brawler ni ang Thailander, haom sa duwa ni Donnie,” dugang ni Villamor.

Basi sa rekord ni Nantapech nga 22-3, 15KOs, usa kini siya ka knockout puncher hinungdan nga gikinahanglan nga magmatngon si Nietes.

Mas batan-on sab si Nantapech, 27, kumpara kang Nietes, 34.

Hinuon alang ni Nietes, wala nakaapekto ang iyang pangidaron sa iyang katakos gumikan kay wala siya’y undang sa pag- training, naa o wala siya’y away.

“Nagka-edad ko pero ang akong lawas nagkabata,” matod pa ni Nietes.

Ang chief trainer sa ALA gym nga si Edito Villamor, igsuon ni Edmund, nagkanayon nga sukad pa sa una, wala nausab ang kinaiya ni Nietes sa pag- training.

“Wala gyud mausab ang training ni Donnie sukad pa sa una hangtod karon. Grabe ang iyang desiplina,” pasabot ni Edito.

/Alan Tangcawan ■ UPPERCUT. Giaksyunan og uppercut ni Donnie “Ahas” Nietes ang dagway sa poster sa iyang umaabot nga kontra nga si Thai Komgrich Nantapech. Ang duha ka mga boksidor magsangka karong Abril 29 sa Waterfront Hotel sa Lahug, Cebu City aron ilugan ang...