Modernong merkado sa Tabunok mobarog

Kahingpitan sa modernong merkado sa Tabunok ang napanglantawan human nga na-bidding na ang phase-2 ug phase-3 nga kapin sa P110 milyones nga proyekto.

Ang kontraktor nga mitukod sa phase-1 mao gihapon ang migawas nga labing ubos nga mi-bidding sa phase-2, sa kantidad nga kapin sa P97 milyones.

Niadtong Huwebes gipahigayon ang bidding sa may People’s Hall sa Talisay City Hall, alang sa phase 2 ug phase 3.

Upat ka mga kontraktor ang mitambong nga naglangkob sa Tuanson Construction, Rex E. Morales, PLD ug Quirante Construction.

Sa upat ang Tuanson Construction maoy nigawas nga labing ubos og presyo nga nagkantidad og P97,922,838.

Ang Tuanson Construction mao sab ang nakadaug sa phase 1 sa katukoran sa merkado nga gikatakda na usab nga mahuman.

Samtang ang Bongar Co. Inc. ang nigawas nga lowest bidder sa phase 3 nga proyekto nga mao ang Sewage and Treatment Plan nga mokantidad nga P11,800.000.

Si Budget Officer Edgar Mabunay nga mao sab ang chairman sa Bids and Awards Committee (BAC) miklaro nga human sa bidding kadtong mga ni-bid nga labing ubos di pa sabton nga sila na ang makakuha sa project.

Kini tungod kay ila paman kining ipaubos sa post evaluation aron sab maseguro kun sila responsive ba nga kompaniya aron di maalanganin ang siyudad sa proyekto.

Apan sa kaso sa Tuanson si Mabunay miingon daw hayag na ang kahigayonan nga sila ang makakuha sa award sa rason tungod kay aduna naman silay agi nga gipakita sa mga opisyales sa Talisay ug gawas pa anaa na ang ilang mga kahimanan sa construction site nga maoy nakapaminus sa ilang gi-bid.

Nasayran, ang phase-1 sa merkado mahuman na karong Abril 8.