3 PATAY SA PINUSILAY SA DANAO
'MISUKOL’ SA MGA PULIS SA BUY BUST
Tulo ka gikatahapang drug pushers nangamatay sa buybust operation human nakigpinusilay sa kapulisan kagahapon sa alas 2:05 sa kadlawon sa Sitio Libon, Barangay Guinsay, dakbayan sa Danao.
Mga napatay giilang sila si Julius Gacita, 42, leader sa grupo, minyo, taga Barangay West Cogon, Carmen; Dexter Giango, 38, dunay kapuyo, taga Barangay Looc, Danao; ug si Edwin Cole Oriendo, 34, ulitawo, taga Barangay Panalipan, Catmon, Sugbo.
Ang tulo dead-on-arrival (DOA) sa ospital sa dakbayan sa Danao.
Si Sr. Insp. Alejandro Batobalonos, hepe sa Danao Police Station nga nahinabi sa Superbalita Cebu, nibutyag nga ilang nakuha sa crime scene ang 12 ka gagmayng putos sa shabu, 4 ka medium zise nga putos, motimbang og 25.48 gramos nga mobalor og P364,000.
Lakip sa nabawi ang P1,000, P12,000 nga boodle money, usa ka KG9 submachine pistol, kalibre.45 nga pistola, usa ka .38 caliber revolver ug mga bala.
Matod ni Batobalonos nga pipila na ka buwan nilang gi-monitor si Gacita.
Nipalit silag usa ka bultong shabu nga mobalor og P12,000 gamit ang budol money.
Dihang gitunol na ang shabu, si Oriendo kalit lang namusil kanila gamit ang KG9 sub-machine pistol human nakabantay sa mga operatiba.
Way nangaigo kanila kay nakapasalipod sila sa mga punoan sa lubi.
Nidagan sila si Gacita ug Giango nga nakigpunisilay kanila samtang nagdinaganay.
Sa ilang pagbawos, nangaigo ang tulo nga nanago sa kalibunan.
“Dili nimo sila daling maduol kay naa silay back-up si Edwin. Permi magtakin sa iyang KG-9. Manukol gyud ni sila kay pulos sab dunay daghang mga armas,” dugang ni Batobalonos.
Si Gacita level 2 drug pusher sa ilang listahan.
Sa una pa makabaligya kinig kapin sa 200 gramos nga shabu matag simana.
Ang amo niini gikatahong naa sa usa ka prisuhan sa dakbayan sa Lapu-Lapu nga taga dakbayan sab sa Danao.
Ilang gisubay kon wa bay koneksyon kini kang Alvaro Alvaro, alias Barok.
Si Gacita nag-abang og balay sa may Barangay Poblacion, dakbayan sa Danao, pero kay apeke siya sa ilang kalihukan, adto siya magbaligyaan sa drugas sa Barangay Guinsay kay daghan sila og kaagian.