BITIN SA WIRE NAKAINGON SA TRAFFIC SA MINGLANILLA

Nangaalarma ang mga tawo ug motorista human nga usa ka bitin nga moabot og kapin unom ka tiil ang gitas-on, nakit-ang nagbalikos sa wire sa kuryente mga alas 5 kagahapon sa buntag.

Ang bitin nakaingon sa pag-hinay sa dagan sa trapiko sa Natalio Bacalso Avenue sa Poblacion Ward 3, Minglanilla, Cebu. Ang bitin, usa ka reticulated

python, nakagawas sa iyang hawla kay nakalimtan sa tagiya og sira pagkagabii.

Ang reticulated python ang kinatas-an ug kinabug-atan nga bitin sa tibuok kalibutan. Kasagaran kining makit-an sa Southeast Asia.

Matod sa mga lumolupyo sa Ward 3, pasado alas 5:00 kagahapon sa buntag, ilang nakit-an ang bitin nga nagbalikos sa wire sa kuryente.

Gitapok-an kini sa mga tawo nga maoy nakaingon sa kahi- nay sa dagan sa mga sakyanan kay nanguryuso sa bitin.

Ang off duty nga si PO3 Humprey Alpas, sakop sa Oslob Police Station, taga didto sa ra usab sa maong lugar, nipusil sa bitin makaduha ka mga higayon gamit ang air gun pamasin nga mahulog.

Matod niya nga ang mga opisyal sa barangay maoy nihangyo kaniya nga ipapusil aron moluag na ang dagan sa mga sakyanan.

“Dili man ni makamatay. Ang ikog ra atong targeton, para maluya siya unya mahulog kay naka- cause na siya ug

traffic,” matod ni Alpas. Apan bisan pa niini, wa maluya ang sawa ug wa usab matagak.

Mga pasado alas 11 sa buntag kagahapon, mga sakop na sa Visayan Electric Company mao nay nakakuha sa bitin pinaagi sa pagkuhit niini.

Daghan sa mga lumolupyo sa lugar ang nangangkon nga ila ang maong bitin./

/Alex Badayos ■1. KUMBITAY: Ang sawa (reticulated phyton) nga mikumbitay nakapadani sa mga tawo ug mga motorista nga nangagi sa Minglanilla.

/ Alex Badayos ■5. GISUKOD: Sa wa pa patambali sa iyang gamay nga samad, ang gitas-on sa bitin gisukod una.

■2. GIPUSIL: Aron kini matangtang ug matagak sa ingon di na madani ang mga tawo, gipusil ang mao nga bitin, apan wa matagak gikan sa wire. / Alex Badayos

/ Alex Badayos ■3. GIKUHIT: Mga alas 11 sa udto, niabot ang mga taga Veco, ilang gikuhit ang bitin gikan sa wire aron makuha.

/ Alex Badayos ■4. GISUD SA SAKO: Nilampos sila. Human makuha sa mga lineman, ang bitin ilang gisud sa sako aron di kini makapaak og tawo.