KANHI JAIL WARDEN, LAING 10IMBESTIGAHON SA CODI
Kanhi jail warden sa Cebu Provincial Detention and Rehabilitation Center (CPDRC) Dr. Gil Macato, ug laing napulo ka mga personnel niini ang nag-atubang og imbestigasyon sa Committee on Complaints and Investigation (CODI) sa Kapitolyo.
Kini subay sa mga naugkat nga kahiwian sa nilabay nga mga adlaw atol sa gilusad nga greyhound operation niadtong Pebrero 28. Gikompirmar sa chairman sa CODI, Atty. Orvi Ortega, nga nakadawat sila og tulo ka mga reklamo gikan kang CPDRC officer-in-charge, Bobby Legaspi niadtong Lunes, batok sa maong mga kawani.
Lakip sa gireklamo ang kanhi nurse sa CPDRC clinic ug tulo ka mga jail guards, nunot sa giingong katukuran sa usa ka espesyal nga selda o kubol alang sa usa ka piniriso nga nag-atubang ug drug case. Na-diskobrehan kini atol sa greyhound operation sa PDEA.
Nag-una si Macato sa gireklamo
tungod sa command responsibility.
“It’s just an investigation. They’re not guilty until proven,” sumala ni Legaspi. Laing gireklamo mao ang usa ka kawani sa CPDRC nga ni-claim nga iya ang usa sa mga laptop nga nakuha gikan sa usa sa mga selda atol gihapon sa greyhound operation. “How did it get there?,” nakapangutana si Legaspi. Ang laing lima mao ang in charge apan napakyas sa pagbalhin sa 17 ka mga insular
prisoners paingon sa New Bilibid Prison niadtong buwan sa Enero.
Matod ni Ortega, lakip ang maong mga reklamo sa tukion atol sa tigom sa CODI karong adlawa.
Gipaniguro sa CODI nga hatagan ug due process ang mga gireklamong personalidad ug hatagan sila’g higayon nga makatubag o makapanalipod sa ilang kaugalingon.
Gipadayag ni Ortega nga nila isalikway ang preventive suspension sa mga gireklamo.