ATM SKIMMER MIATAKE NA SAB

Mismo ang regional director sa Commission on Population (Popcom) 7 nabiktima na usab sa ATM skimming sa dakbayan sa Sugbo.

Giingon nga mga kawani sa duha ka mga ahensiya sa gobyerno ang nabiktima sa maong klase sa scam diin nahitabo na usab kini sa pipila ka opisyal sa dakbayan sa Sugbo.

Samang bangko ang naigo gihapon nga mao ang Land Bank.

Si Atty. Bruce Ragas, kinsa director sa Popcom, nakuratan nalang human ang gi-deposito niini nga kwarta niadtong Biyernes, nahanaw nalang niadtong Sabado.

Sa pakighinabi sa sibyaanang dyAB kang Rosalie Baguio, kinsa administrative officer sa maong ahensiya, nabantayan niya niadtong Lunes nga nahanaw na iyang P18,000 gikan sa iyang ATM.

Dugang ni Baguio nga niadtong Sabado nabantayan ni Ragas nga wa na iyang kwarta diin alas 7:20 sa buntag nahimo ang unauthorized withdrawal.

Si Baguio, sa iyang bahin, nakita niya pinaagi sa iAccess o online service sa bangko, nga kaduha nahitabo ang unauthorized withdrawal, sa alas 9:56 sa buntag diin P10,000 ang gi-withdraw ug 9:57 diin P8,000 ang gi-withdraw.

Sa pakisusi niini sa maong bangko, di sa ATM machines sa Landbank nag-withdraw ang scammer ug didto sa laing ATM kay aduna man kini charge.

Laing tulo ka mga kawani usab ang biktima sa skimming diin ang usa niini anaa pa sa nasod sa Japan.

Daling ni-report ug ni-file og reklamo sila si Baguio ug Ragas sa Landbank Escario diin narehistro ang ilang ATM payroll account.

Nipasalig ang maong bangko nga duha ngadto sa tulo ka buwan pa mahibalik ilang kwarta.

Gisuwayan ning mantalaan pagkuha sa habig sa Landbank apan anaa sa clients call ang Cebu Branch head atoll ning pagkutlo.

Si Eugene Rigodon, presidente sa Cebu Bankers’ Club nagkanayon nga aduna sila’y nadawat nga reklamo sa susamang klase sa scam apan nagdumili kini pagbutyag unsa nga bangko.

Dugang ni Rigodon nga kon aduna’y reklamo sila nga madawat gikan sa mga depositors, ilahang ipatawag ang bangko alang sa conference.

Gipasabot hinuon niini nga magdepende sa palisiya sa bangko kon unsa ang pamaagi niini sa pagdala sa kaso sa mga skimming.

Pabilin nga tambag nila mao ang kanunay nga pag-ilis sa pin ug kanunay nga pagcheck sa balance.