Capitol, Cebu City andam na sa dokumento sa 93-1

Giandam na sa Cebu City ug Cebu Provincial Government ang ilang mga dokumento nga iduso ngadto sa Commission On Audit para mahatagan og hingpit nga kasulbaran ang problema sa mga molupyo sa 93-1.

Si Francisco Fernandez, executive assistant II ug special assistant ni Mayor Tomas Osmeña, nagkanayon nga moduso sila sa suwat ngadto sa COA nga maoy katapusan nilang lakang para mahingpit ang pagbinayloay sa yuta.

Ang City Council nitugot na kang Osmeña pag-donate sa yuta nga gipanag-iya sa Dakbayan sa Sugbo.

Sa samang higayon, ang Provincial Board nihatag og gahom kang Gobernador Hilario Davide III pagdonar sa yuta ubos sa Provincial Ordinance 93-1.

Si Fernandez nibutyag nga nahinabi na nila ang regional director sa COA ug gihatagan sila og ideya aron dali ra maaprobahan ang landswap.

Gipasabot ni Fernandez nga sa di pa madonar ang yuta ngadto sa laing local government unit sama sa Kapitolyo, nagkinahanglan kini og pagtugot sa COA.

Para madonar ang yuta, usa sa rason mao nga wa na kinahanglana ang matang sa propiedad.

Gitug-an niya nga nakahimo nga og letter ang City Legal Office ug pirma na lang ni Osmeña ang gihuwat diin personal kining itunol sa mayor ngadto sa hepe sa COA.

Matod ni Fernandez, makaya ra sa libuan ka occupants sa 93-1 ang matag buwan unya nga bayronon aron ilang maangkon ang yuta sanglit pinasubay kini sa Housing and Urban Development Council.