Pagbakuna mauswag
Giangkon sa opisyal sa Department of Health (DOH) 7 nga kon di maabot ang implementing guidelines sa dengue vaccination sa Sugbo karong buwana, posible nga sa sunod nga school year na kini mapatuman.
Kini nagpasabot nga bag-o nga lista sa mga tinun-an na usab ang makapahimulos niini.
Matod sa epidemiologist sa Regional Epidemiology and Surveillance Unit (RESU) 7 Rennan Cimafranca nga kon malangay pa ang guidelines sa pamakuna gikan sa kaulohan posible nga di na ang kasamtangan nga grade 4 students ang mopahimulos niini.
Dugang ni Cimafranca nga sagad sa mga klase motapos na sa Marso ug tungod niini, kadtong kasamtangan nga grade 3 students kinsa nagsingabot nga grade 4, mao na unya kadto ang makapahimulos sa bakuna.
Gitug-an niini sa Superbalita Cebu nga naabot na ang bakuna sa Sugbo apan di gusto ang regional director sa DOH 7 nga si Dr. Jaime Bernadas nga ipatuman nga way guidelines.
Lahi sa mga gipatuman sa laing rehiyon, ang sa Sugbo, province-wide lang ug di ang tibuok Central Visayas.
Kapin sa 700,000 ka mga tinun-an sa grade 4 ang bakunahan karong buwana diin niadto pa untang Pebrero apan nalangay pa.
Kon maabot ang guidelines sa di pa matapos ang klase, ipang-apud-apod dayon nila sa Provincial ug City Health Offices ang mga bakuna aron dali kini nga magamit ngadto sa mga tinun-an sa grade 4.