Gugma’g pagtuo

Ang gugma gitakin sa pagtuo sa akong pangaliya sa Ginuo nga unta buhion pa ko Niya. Agig pagdawat nagmilagro Siya. Gani misayaw sa akong pagbalik paghangop Kaniya.

Sir, sa last x-ray napapas nang tanang plima sa imong baga. Kahibudngan! Matod sa akong doktor. Wa ko mahibung kay ako sayod nga pagbuot to Niya. Gitangtangan ko sa vibrator ug tubo alang sa akong pagkaong likido.

Nagpasalamat ko Niya. Sa ikaduhang higayon, miarko ang badlis nga puwa ibabaw sa iyang ulo. Misayaw na sad Siya. Nalipay Siya nga ibahin na ko sa private room sa ospital for recuperation.

Lima ko ka mga adlaw sa ICU sa Cebu South General Hospital sa Tuyan, Naga City. Mga adlaw sa pakigharong sa kamatayon. Gani sa akong damgo giduaw ko sa akong mga suod nga dugay nang nangamatay.

Apan ang nakadasig nako mao ang akong maguwang nga patay na sad nga miduaw nako. Brad, dont worry not yet your time. Nasayod ang akong maguwang kay siya mismo usa na ka espirituhanon.

Nasayod ko nga nagdibal ang mga pangaliya sa akong mga higala ug sa nakaila kanako bisan ang wa makaduaw. It was poet John Milton who said, “they also serve who only stand and wait!”

Nagpasalamat ko sa tanan sa ilang mga pangaliya. At least, mga bisibis sa gugma gikan sa ilang kasingkasing. Inahog sa ilang pagtuo sa gahom sa Diyos nga maoy tinubdan sa tanang kaluoy.

Sa iyang paglugway sa akong kinabuhi, unsa pay ipabuhat Niya nako? Gidid-an na ko sa akong doktor sa pagbuhat og mga stressed job. Bisan sa pagsuwat may kinutoban na.

Usba na ang imong kinabuhi, Sir. Natagbaw ka na sa miagi mong kinabuhi. Dinhi nakamatngon ko. Husto, kaayo ang doktor. A good cue nga maoy ipabuhat sa Diyos kanako.

Apan gawas niana duna koy lain pang buhaton nga ikalipay sa kahitas-an. Sayod ko nga sa akong talento makabawos ko Niya pinaagi sa pagbalaan Kaniya dinhi sa yuta maingon man sa langit.