Pakigbisog ni Lopez
Asa na ang mga nagpakabana sa kalikupan o environmentalists labi na ang grupong walhon? Asa na ang simbahan nga nangampanya sa pagpanalipod sa kinaiyahan, kutob na lang ba sa pulpito? Namatikdan nga lumoy sila sa luyo samtang nag-obserbar sa sama sa kalisod nga paglusot sa uhas sa dagom ni Gina Lopez sa kompirmasyon sa Commission on Appointments isip kalihim sa Department of Environment and Natural Resources (DENR).
Si Lopez, aktibista ug lubas nga environmentalist, nipakita sa iyang labok sa departamento ug kahigpit sa pagpanalipod sa kiniyahan ubos sa pundasyon nga social justice nga lig-ong basihanan sa malahutayong ekonomikanhing kalamboan.
Ang pakigbisog ni Lopez niadto sa dalan mas nahimong makahuluganon ug dunay ngipon karon nga gitudlo ni Presidente Rodrigo Duterte nga kalihim sa DENR.
Daghang nahangan ug natandog sa way lipudlipod nga mando ni Lopez sama sa pagpasira sa 23 ka minahan ug pagkanselar sa pipila ka mineral sharing agreements sa kagamhanan.
Ang habig ni Lopez ug mga tagdumala sa isyu sa minahan nautingkay pag-ayo sa debate sa CA apan, nagkaklaro ang kinatibuk-ang papel sa mga tagdumala sa dagkong minahan luyo sa mga tawong lig-ong nibarog ug ning-ataki sa administrasyon, subay sa oberbasyon ni Duterte.
“Kayong mga mining, I know you are funding the opposite side. Alam ko na ngayon kung sinong gumgastos sa kanila. I know that some of you are giving funding to the other side to destabilize me. If the police and military will allow it, it’s their problem,” pulong sa presidente niadtong Lunes bahin sa appoinment ni Lopez.
Mao ba kaha usab kini rason nga way igong imik o kisaw ang walhong grupo sa pagsuporta ni Lopez? O pulitika kaha? Maingon nato nga ang pakigbisog ni Lopez sukdanan unsa katiunay ang baroganan ug salingkapaw nga pagpakabana sa uban.