Don’t ever go
Hapon na ming namauli. Gikapoyan ko bisag kadyot ra kong naligo sa beach. Wa na gani ko makig-estorya kang Ronnie kay diha man siya sa among balay, wa siya modiretso sa pagpauli sa ilaha. Milargo kog sulod sa akong kuwarto. Naghigda-higda ko hangtod nga nakatulog ko. Nakamata ko sa pagpukaw ni Mama nako kay manihapon na.
Igo lang kong mikaon og gamay unya mibalk dayon kog sulod sa akong kuwarto. Samtang naghigda ko, nahunahuna ko si Homer. Next Sunday, duawon ko siya sa Rehabilitation Center. One month na siya didto. Maybe, sa ako pang hunahuna, di na siya karon grabe ka addict tanawon. Limpiyo na tingali siya tan-awon. Di na tingali siya bayolenti. Usa ka rason nga gipa-rehab si Homer sa iyang
parents kay bayolenti na man siya. Manghagis siya sa ilang balay labi na ko makasuyop og shabu. Laing rason nga tingalig mapatay siya sa mga polis. Hugaw na siyag pamiste kay di na mag-ilis. Mora na siyag buang tan-awon.
Unya kalit kong nahunahuna si Ronnie. Tingali, sa ako pang hunahuna, kon siya pa ang akong boyfriend, malipayon gyud ron. Apan di gyud tingali mi para sa usag usa kay si Homer man ang akong gimahal.
Pagka ugma sayo, usa ka balita ang nahiabot nako. Morag nawala ko sa akong kaugalingon. Mora kog gipatay niadtong tungora. Mitiyabaw ko pag-ayo. Si Homer naghikog sa sulod sa iyang kuwarto sa Rehabilitation Center. Ang iyang habol maoy gihigot niya sa iyang liog. Midanguy-ngoy gyud ko. Sila si Mama ug Papa wa mobuwag nako. Tingali, nahadlok silang duna koy daotang buhaton sa akong kaugalingon kay nakahibawo man sila sa kadako sa paghigugma ko kang Homer.
“This is not the end of the world, Cres.”
Naghilak si Sharma. Giduaw gyud ko niya sa balay kay gitawgan man diay siya ni Mama ug gipahibawo sa tanang nahitabo. Nakagakos sab ko sa akong best friend.
“Sakit kaayo nako ni, uy, Shar.”
“I know. Pero wa na man tay mahimo. Nahitabo na man ni. Don’t forget nga duna sab kay kaugalingong pangandoy sa kinabuhi. Ayaw ni iangin sa nahitabo ni Homer.”
Naghilom na lang ko kay mihuot gyud pag-ayo ang akong dughan.