Araneta andam na

Human sa iyang mga away sa ginagmayng boxing promotions nga gipahigayon sa lagyong mga dapit, ang wala’y pildeng si Christian Araneta andam na’ng mosagubang sa labing una niyang tagas sa dagko nga boxing event.

Si Araneta usa sa mga mopakita og aksyon sa undercard sa Who’s Next? 4 Pro Boxing Series karong Sabado sa Waterfront Cebu City Hotel and Casino sa Lahug, Cebu.

Ang 21 anyos nga taga Borbon,Cebu, kinsa adunay 13-0, 11KOs nga rekord, makigbatok kang Indonesian Demsi Maufoe alang sa inilugay sa bakanteng World Boxing Organization (WBO) Oriental light flyweight sa co-main event.

Kini maoy kasamtangang labing dakong away ni Araneta.

Si Araneta, kinsa mag-22 anyos ugma, unang miaway sa professional rank niadtong Septiyembre 7, 2013 unya mihakot kini’g sunodsunod nga impresibong kadaugan sa ginagmayng boxing promotions sa Balamban, Borbon, Gen. Santos City, Masbate, Bukidnon, Danao ug Mandaue City.

Nadaog ni Araneta ang Philippine Boxing Federation light flyweight belt sa iyang ikawalo pa lang nga away diin iyang gipaundang si Charile Cabadilla.

Naghinamhinam na si Araneta nga makig-away kang Manufoe, kinsa adunay 11-6, 8KOs nga rekord.

Giklaro ni Araneta nga dili niya usikan kining maong oportunidad ug buhaton niya ang tanan aron maangkon ang kadaugan.

Ang mga tiket sa promosyon nagbalor og P500 (VIP), P300 (Gold) ug P100 (Silver).

Mahimong mapalit ang ticket sa Waterfront Cebu City Hotel gikan sa alas 2:00 sa hapon hangtod sa alas 8:00 sa gabii.