SPURS NO.1 NA

Daghang sipyat man tuod ang nahimo sa host San Antonio Spurs apan nakamaneho gihapon kini pagbuntog sa Atlanta Hawks, 107-99, kagahapon sa National Basketball Association (NBA).

Sa kadaugan, nailog sa Spurs ang temporaryong No.1 overall gikan sa Golden State Warriors. Parehong naggunit og 52-14 nga rekord ang Spurs ug Warriors apan ning puntoha, nakapabor ang Spurs sa posisyon.

Ang Spurs nakamugna og 23 ka turnovers – labing daghan nilang nahimo sa season – apan mibawi sila sa depensa aron lupigon ang Hawks.

Niini, malipayon ug kuntento ra si Spurs coach Gregg Popovich.

“I was really pleased that they continue to guard and hustle the way they did despite being sloppy with the ball,” batbat ni Popovich.

Sa opensa, wala sab nagpabangbang ang Spurs ug nakapasulod kini’g 16 ka

three-pointers – labing daghan nila sa season – sa ilang ika-19 nga sunodsunod nga kadaugan sulod sa ilang balwarte.

Nagpakatap og 31 puntos si Kawhi Leonard aron pangulohan ang lima ka mga sakop sa Spurs nga nakamugna og double-digit nga puntos.

Si Patty Mills nidugang og 15 puntos, nitampo og 14 puntos matag usa sila si David Lee ug Danny Green samtang niamot og 13 puntos si Pau Gasol.

Ang Hawks, nga nahagsa sa 37-30 nga rekord, gipangulohan ni Dennis Schroder pinaagi sa iyang 22 puntos, nihatag og 17 puntos si Tim Hardaway Jr., nitunol og 16 puntos si Paul Millsap samtang nitampo og 15 puntos si Kent Bazemore.

Ang Spurs ningkombati nga wala si LaMarcus Aldridge, kinsa adunay gipamati sa lawas, apan natapakan nila og maayo ang haw-ang nga nabiyaan sa ilang labing sinaligang forward.

“We just want him to get better, don’t want to rush it,” matod ni Leonard kabahin kang Aldridge. “That’s something serious with his heart.” Wala sab ningduwa sa Spurs ang ilang naangol nga pointguards nga sila si Tony Parker ug Dejounte Murray. Gumikan sa kanindot sa duwa ni Leonard, nakasugakod ra gihapon ang Spurs. “I felt good,” dugang Leonard. “Just like any other game. Our medicine team and trainers did a good job of getting me prepared.”

Human siya nasipyat sa iyang unang duha ka itsa, si Leonard nakapasulod sa nagsunod niyang lima ka mga itsa sa dayong human sa 1st quarter.

Wala na molubad ang duwa ni Leonard gikan niini hangtod na sa katapusang gutlo.

/ AP Photo ■ FOUL. Nakahagpat og foul si Atlanta Hawks center Dwight Howard gikan kang San Antonio Spurs forward Davis Bertans (42) ning aktuha sa usa sa mga aksyon sa NBA kagahapon. Mingdaog ang Spurs ning duwaa aron ilugon ang kasamtangang No.1 overall sa...