Sikat nga tigbaligya og tubig migraduwar na
Nigraduwar na kagahapon ang sikat nga namaligya og tubig sa dan A. Soriano, Barangay Mabolo dakbayan sa Sugbo nga si Jay Kummer Teberio o naila nga Dodoy.
Ang 21-anyos kinsa lakip sa mga nigradwar kagahapon sa University of Cebu (UC) nahuman sa kursong Bachelor of Science in Secondary Education, major in Music, Arts, Physical Education and Health.
Sa interview sa SunStar Pilipinas kang Dodoy, siya nitataw nga malipayon siya nga nakalampos sa kolehiyo bisan sa mga hagit nga iyang naagian ug sa iyang pamilya.
Nakadawat usab si Dodoy og medal of recognition gikan sa UC isip usa sa mga self-supporting nga mga tinun-an sa maong tunghaan.
Ang inahan ni Dodoy, si Flor, wala makapugong sa luha niini dihang nakita ang iyang anak nga nagdawat sa diploma atol sa commencement exercises kagahapon. “Ni- graduate na gyud ang akong anak. Happy gyud kaayo ko. Wa gyuy kabutangan sa akong kalipay. Nakahuman na gyud ko sa akong anak sa among paningkamot nga makahuman gyud ang akong anak.
Proud na proud gyud kaayo ko sa akong anak,” matod niini.
Nagsugod pamaligya og tubig sa kadalanan si Dodoy dihang 12-anyos pa siya.
Usa kini sa diskarte niya aron makatabang sa iyang ginikanan sa iyang pag-eskwela.
“I’m very thankful. Despite all the challenges I had to overcome, I will soon reap the fruits
of my labor,” dihang nahinabi kini sa SunStar Cebu.
Dihang gipangutana kini sa iyang mensahe alang sa mga batan-on usab nga gusto makalampos sa ilang pag-eskwela: “Never give up. Mag- pray lang gyud ta sa Ginoo kay naa man gyud Siya motabang nato. Hindi nya tayo pababayaan. Fight, fight, fight.”
Plano na ni Dodoy nga motrabaho sa pribado nga tunghaan human siya makapasar sa teachers board exam karong tuig. Si Dodoy nahimong inila human siya nakuhaan og hulagway nga namaligya og tubig sa karsada nga magkawo, mag- make up.
Sukad nag-viral ang iyang hulagway sa Facebook, daghan na ang nagka- interest sa iyang kinabuhi.
Ang iyang buhat nga pagtabang sa iyang ginikanan gidayeg kaayo sa mga netizen. /