MOTION SA MGA OPISYAL SA BRGY. ERMITA GIBASURA

Gibasura sa Office of the Ombudsman Visayas ang motion for reconsideration nga giduso ni Kapitan Felicisimo “Imok” Rupinta ug mga kaubang konsehal sa brgy. Ermita, dakbayan sa Sugbo, subay sa ilang preventive suspension nga mugna sa reklamo sa Phil. Drug Enforcement Agency (PDEA) 7.

Gimanduan na karon ang maong mga opisyal pagduso sa ilang counter affidavit.

Human gisuspenso niadtong Enero nunot sa giingong kapakyas pagtabang sa mga tinugyanan sa PDEA sa gipahigayon nga anti-drug operation sa ilang barangay sa miaging tuig, nangayo og rekonsiderasyon si Kap. Rupinta ug ang pito ka mga konsehal sa ilang barangay ngadto sa Ombudsman.

Sigun sa maong mga opisyal, dili sila angayang ipaubos sa preventive suspension kay wa sila hatagi og higayon nga makatubag sa mga reklamong gisang-at batok nila, nga naglakip sa grave misconduct, gross neglect of duty ug conduct prejudicial to the best interest of the service. Sa kamanduan nga giaprubahan ni Deputy Ombudsman Paul Elmer Clementer niadtong Pebrero 14, gibasura niini ang MR sa maong mga opisyal ug gi- affirm ang una nang desisyon pag-suspenso nila. Gipasabot sa information officer sa Ombudsman Visayas, Atty. Maria Corazon Naraja, nga anaa sa ilang lagda nga dili na kinahanglang patubagon ang mga gireklamong opisyal kon duna silay luwatan nga preventive suspension order.

Giklaro sa Ombudsman nga dili penalty o silot ang gipahamtang batok ni Rupinta ug sa mga konsehal sa ilang barangay ug tumong lang niini nga mapugngan nga makapanghilabot sila sa imbestigasyon sa anti-graft office.

Karon nga nasugdan na nila ug serve ang ilang preventive suspension, gitumbok ni Naraja nga ang labing maayong legal nga lakang nga buhaton sa maong mga opisyal ang pagduso na ug counter-affidavit.

Nga sa MR sa mga opisyal sa Ermita, gipadayag niini nga kalapasan sa lagda sa konsitutsyon alang sa due process ang gihimo nga pagsuspenso kanila ug 6 ka buwan.