P.7 M nga shabu nasakmit

Kapin sa P700,000 nga kantidad sa shabu ang nasakmit sa kapulisan sa Lapu-Lapu human sa buy-bust operation batok sa duha ka mga pusher nga taga-Liloan ug dakbayan sa Sugbo.

Ang Intelligence and Operations Branch sa Lapu-Lapu City Police Office ang malampusong misignit nila ni Romwel Toling Tagalog, 33, ug John Paul Paca Cabije, 22, atol sa buy-bust operation kagahapon sa kadlawon.

Si Tagalog, minyo nga tagaProper, Lilo-an, Cebu samtang si Cabije, ulitawo ang taga-Sityo Wakwak, barangay Pasil, Cebu City ang nadakpan sa Hangar Road, Sitio Kalubihan, barangay Pajac, LapuLapu diin gihimo ang anti-drug operation.

Ang maong dinakpan kumpiyansa nga mibaligya og usa ka pakete nga adunay shabu ngadto sa nagpaka-aron ingnon nga buyer apan nasuta nga mas daghang stock nga droga diha sa ilang posisyon.

Nakuha ang usa ka dosena nga medium pack ug duha ka gagmay nga pakete nga adunay sud nga gituohang shabu nga gibana-bana nga adunay gibug-aton nga 61 gramos nga nagkantidad og P719,800.

Si Tagalog giingong armado sa dihang nakuhaan og 9mm pistol nga adunay pito ka mga bala ug P930,000 cash nga gituohan halin sa ilang pagpamaligya.

Sa laing operasyon dugang duha ka mga drug personality ang nasikop sa Police Station 4 (Marigondon) sa kagahapon.

Ang mga dinakpan naila nga sila si Juperlito Jimenez Degamo, 47 nga taga-barangay Basak ug Josedin Damaso Sabijon, 40 nga taga-barangay Gun-ob.

Nakuha sa grupo ni PSInsp. Alcon Escosura ang 16 ka mga gagmayng pakete nga adunay sud nga gituohang shabu nga gibana-bana nga nagkantidad og P4,800.

Samtang napun-an og usa pa ka dinakpan sa operasyon sa Police Station 3 (Hoopsdome) ang sidekick nga si Gian Sultan Mante, 30 samtang naka-eskapo si Jolito Tampus Flores alyas Lalart, 30 atol sa dinakpanay sa miaging gabii. / FVQ