GREYHOUND OPERATION SA NCJ

Nasakmit sa hiniusang operasyon sa Philippine Drug Enforcement Agency (PDEA), Cebu City Police Office (CCPO) inabagan sa Bureau of Jail Management and Penology (BJMP) ang lainlaing kontrabando atol sa greyhound operation sulod sa New City Jail.

Apan ning higayona, gamay na lang ang nakuha sa mga operatiba sanglit balor P30,000 nga shabu ang nadiskobre,

9 ka cellular phones, mahait nga hinagiban, paddle,

baseball bat atol sa pagronda nga gisugdan ala 1:30 sa kaadlawon ug nahuman sa buntag.

Si Konsehal Dave Tumulak, deputy mayor for police matter ug chairman sa public order

and safety, nalipay sa resulta. “Base sa atong nakita positibo kaayo ang resulta kana kon wa toy leak ug tinuod gyud to, nindot na kaayo tong tilimadon ug dili na sama sa nanglabay nga greyhound operation,” matod sa konsehal.

Gihulagway ni Tumulak nga kalma ug wala natarantar ang 4,156 ka mga piniriso sukwahi sa niagi nga greyhound operation kinsa wala gidungan pagpaadto sa quadrangle ug dili sama kaniadto nga sila gipahubo sa tanang sapot apan ning puntoha gipasul-ob sila og brief subay sa direktiba ni Mayor Tomas Osmeña.

Si Director Yogi Ruiz, sa PDEA7 nagkanayon nga nilusad sila og operasyon gumikan sa report nga padayon ang kalihukan sa illegal nga druga ubos sa awhag sa City Government ug sa BJMP.

Sa greyhound operation niadtong Agusto 2016, nakuha ang P4.7 milyones nga kwarta, shabu, nubain, cellphone, TV ug drug paraphernalia.

Si Tumulak nagkanayon nga padayon nga problema sa pasilidad ang tubig nga niresulta sa hugaw nga palibot.

Ang konsehal, kinsa nikuyog sa operasyon sa PDEA ug CCPO, nibutyag nga grabe kabaho sa hugaw sa tawo ug ihi sulod sa male dormitory.

Si Tumulak nibutyag nga ilang tun-an apil sa BJMP ug unsay matabang sa city government aron masuplayan og igo nga tubig ang City Jail aron aduna silay magamit pagkaligo ug pagbanwas sa pansayan.