Skimming case sulbad na?

Nunot niining pagkasikop ning maong mga langiyaw, sulbad na kaha ang problema skimming.

Kon motrabaho lang kining atong mga awtoridad, masulbad gyud dayon ang mga krimen. Sama niining kaso sa skimming sa mga Automated Teller Machine ( ATM) sa Land Bank of the Philippines (LBP) diin ubay-ubay sa mga depositor sa maong bangko, kadaghanan mga empliyado sa gobiyerno, ang nireklamo nga nakawatan ang ilang deposito.

Mga judges, prosecutors, taga Ombudsman, mga pulis, bombero ug mga empliyado sa ubang mga ahensiya sa gobiyerno diin ang ilang suweldo naa gisulod sa LBP ang nahimong mga biktima. Sakit na uy kay ila god nang hinaguan ang maong kuwarta. Unya kawaton lang ug lain ang magpahimulos. Tiaw ba nimo ang ubang nakuhaan og P100,000.

Niadtong miaging adlaw, mihimo dayon og lakang ang National Bureau of Investigation (NBI) human opisyal nga misang-at og reklamo ang taga LBP ngadto sa maong ahensiya. Ug nadakpan dayon ang tulo ka mga Romanian nationals nga posibleng maoy responsable sa skimming. Tuod man sa dihang gironda ang condominium nga gipuyan sa mga suspek nakuha ang ubay-ubay mga micro-chips ug ingon man ATM cards nga maoy gigamit sa mga suspetsado sa skimming.

Morag kining skimming binuhatan gyud og mga langiyaw kay suhito man sila kaayo. Niadtong miaging tuig usa usab ka Israeli national ang nadakpan sa mga awtoridad nga mihimo gihapon og skimming. Nunot niining pagkasikop ning maong mga langiyaw, sulbad na kaha ang problema skimming?

Ang kuyaw ani nga human ikiha ang mga responsable, makapiyansa ni sila ug papaulion ngadto sa ilang nasud. Sama niadtong mga South Korean nationals nga nahilambigit sa sex tourism. Kinsa pa may itaral kon papaulion kini sila?

Maayo ni pamitayon ning mga tawhana.