Gihulat Gyod
Ang kaluoy mao ang kapasidad sa Dios sa paghulat kanato… Nag-una ang maong mahinangpong paghulat sa yugto mismo sa pasaylo,” nagkanayon si Padre Antonio Spadaro usa ka paring Hesuita. Mipadayon siya: “Gipangita kita sa Dios…gihulat Niya kita… Hikaplagan Niya kita. Ang pagkabalaan nag-agad Kaniya.”
Hapit ma duha ka oras ming naghulat sa pag-abot sa maonga pari nga mihatag sa iyang mga pamalandong mahitungod sa “Mercy as Pillar of Pope Francis’s Pontificate” didto sa Oakridge sa A.S. Fortuna, Dakbayan sa Mandaue. Tulo ka oras man god nga naulahi ang eroplano nga gisakyan niya gikan sa Manila.
Si Padre Antonio mao ang editor sa usa ka sinimanang mantalaan sa Italia, ang “Civilta Cattolica,” kun Sibilisasyong Katoliko. Siya pod ang unang taga-media nga gihatagan og higayon ni Papa Francisco sa pag-“interview” kaniya. Gani kuno sa sinugdanan nagduhaduha pa ang Santo Papa kon magpa-“interview” ba siya.
Sa maong “interview” gipangutana niya ang Papa, “Kinsa man si Jorge Bergoglio?” – kini ang tinuoray nga ngalan sa Papa. Namalandong kuno sa makadiyot ang Papa ug mitubag: “Usa siya ka makasasala kinsa gipuntingan sa Ginoo ang Iyang mga mata.” Mao kuno nga miingon si Papa Francisco nga sa dihang gipangutana siya kon dawaton ba niya ang iyang pagkapili isip Santo Papa, gidawat niya kini isip usa ka “penitensiya”.
Kaluoy ang nadawat sa babayeng Samaritanhon gikan kang Jesus diha sa ebanghelyo
Binasi sa Juan 4:5-42; Exodo 17:3-7; Salmo 95; ug Taga Roma 5:1-2,5-8
ni Juan. Makaingon gyod ta nga gituyo ni Jesus nga magpabilin siya nga nag-inusara didto sa atabay ni Jacob. Gihulat niya ang babaye bisan pag sila lang duha ug nga ang babaye sakop sa usa ka pundok nga kaaway sa mga Judio. Makapaiskandalo to sa iyang mga kaubang Judio.
Sa dihang nagkahinabi na sila, gihulat pod ni Jesus nga makabig og hinayhinay ang babaye nga samaran kaayo. Gani lima na ang iyang nabana ug may kapuyo siya. Mao man gani nga mokawos siyag tubig sa udtong tutok nga way laing tawo. Misugod si Jesus sa praktikal nga panghunahuna sa babaye, ang iyang panginahanglan og tubig alang sa pisikal nga kauhaw. Pag-abot nila sa relihiyosong panabot nga mao ang pag-ambahan sa Dios, gihulat pod ni niya nga moabot sa espirituhanong ang-ang: “Ang Dios espiritu ug ang tanan nga mag-ambahan Kaniya kinahanglan mag-ambahan sa espiritu ug sa kamatuoran.”
Miabot ra gyod ang pagkakabig sa babaye sa dihang iyang gibiyaan ang iyang banga ug miadto sa iyang mga kaubang Samaryanhon – nga kanhiay iyang gilikayan – ug mipaambit sa maayong balita. Namunga ra ang paghulat ni Jesus.
Sa miabot ang tukmang takna, gibubo sa Ginoo ang Iyang Espiritu Santo ngari sa atong kasingkasing. Apan usa kini nahitabo, naghulat siya kanato. Gani sa sulat ni San Pablo ngadto sa mga taga Roma, namatay si Jesus alang kanato samtang kita makasasala pa. Wa siya maniguro usa nga buotan na ta usa siya midawat sa kamatayon. Naghulat siya kanato samtang makasasala pa kita!