Babag council

Maayo na pagkahimutang ang V-Hire Terminal diha sa Barangay Kamagayan nga nauyonan sa mga drayber ug mga pasahero. Nakapadugang pa gyud sa pundo sa Syudad sa Sugbo og mga P300,000 kada bulan.

Kini human nasurambaw sa ilang pagkabutang ang mga drayber og v-hire ug ilang mga pasahero sa panahon ni kanhi mayor Mike Rama.

Kahinumdoman, kalit nga gipasirad-an ni Rama ang Citilink kaniadtong Hulyo 2015 nga walay klarong alternatibo tungod kuno sa utang sa maong establisemento nga moabot og P12 milyones.

Unang desisyon ni Rama mao nga ibutang ang mga v-hire diha sa Taboan market nga grabing kalapukon. Human sa pipila ka semana, gibalhin sila dapit sa Maritima building nga samot pa nga lapukon.

Wa maghunahuna ang mayor nga nagplano man diay siya nga pasirad-an ang Citilink, naghimo unta siya og alternatibong terminal sa wa pa kini buhata.

Bisan og nagpasemento na lang unta siya diha sa Taboan o sa Maritima. Wa niya kini buhata daan.

Moingon siya nga utangan ang Citilink apan wa sab siya mangita og paagi nga mahulipan ang maong pundo sa operasyon sa maong terminal.

Walay sakop sa Team Rama ang nisuki.

Sa miaging tuig, gipangitaan og paagi sa bag-ong administrasyon ni Mayor Tomas Osmeña ang maong kapalpakan ni Rama.

Gibalhin niya kini sa bakanteng lote diha sa Barangay Kamagayan nga kanhi Citicenter. Ug Nakakolekta ang Syudad sa Sugbo og mo-average P300,000 ang bulan. Buot ipasabot, moabot na kini og mga P12 milyones ug daw nahulipan na isip income sa syudad ang isyo kintahay ni Rama kaniadto sa Citilink.

Imbes tabangan nga mosamot kahapsay ang pagpadagan sa maong pasilidad nga nakatabang sa Syudad sa Sugbo, gihimo na hinoon nga isyu sa mayoriya sa Konseho nga mao ang Team Rama.

Dako silang hilom sa panahon sa kapalpakan sa miaging administrasyon. Apan karong natarong na ang maong operasyon sa terminal, ila na hinuong babagan.

Motabang na lang unta sila sa pagtul-id sa nahimong hiwi sa miaging administrasyon.

TRAPIK

Panahon na sab tingale nga ihiklin na nato ang politika sa pag-ateman sa atong trapiko sa syudad.

Kahinumdoman, usa sa mga kugihan nga nagdumala sa trapiko sa panahon ni Rama mao kining atong higala nga si Joy Tumulak. Apan lakip kini siya sa unang nataktak human sa miaging piliay. Apan di malilong nga si Tumulak usa sa mga kugihan ug kasaligang opisyal sa Citom nga nahimong CCTO niadto.

Ang mga kalibre ni Tumulak maoy angay natong idugang sa CCTO sa panahon ni Osmeña. (@ anol_cebu sa Twitter)