Jay ug Assunta balik-tambalan
Gikan sa "Hubog" nga pelikula niadto balik tambalan karon ang Assunta de Rossi ug Jay Manalo sa "Higanti". Una natong nakita ang duha sa pelikula ni Joel Lamangan, diin mao usab ang naghatud kang Assunta isip best actress niadtong 2001.
Malipayon ang duha kay sa dugayng panahon og pinaabot nagkauban karon sila sa maong proyekto.
Istorya mahitungod sa pagpanimalos ang dagan niini ug kon kinsa may panimaslan mao nay atong susihon sa mga sinehan.
Papel sa magtiayon ang Assunta ug Jay dinhi apan dili sila magkaduol, sa laktod nga pagkasulti usa ka pamilya nga puno sa panag-away.
Politiko ang Jay nga bana ni Assunta nga daghan ug mga kontra. May kabit kini dinhi si Katrina Halili ug siguradong may mga init nga eksena ang duhang magkarelasyon.
Si Meg Imperial nga taodtaod na usab nga wala nato makita ug si Jon Lucas usa sa mga "hashtag" sa showtime ang nagdala isip mga anak nilang Jay ug Assunta.
Si Jay usa ka corrupt congressman nga dili gustong somsoman sa mga istorya ug nagtoo nga iyang kamot maoy balaod. Daghan nga mga komplikadong eksena dinhi nga maorag base sa mga tinood nga panghitabo.
Matud sa bag-ong direktor nga si Rommel Ricafort dili kini indie film kondili pangmainstream nga gigastuan og maayo sa ilang producer.
Makauban usab nila dinhi si Dj Durano isip higalang abogado ni Jay, Alwyn Uytingco uyab ni Meg ug naglakip usab nilang Kiko Matos, Daniel Pasia, Lui Manansala ug Ruby Ruiz. Madrama ug ma-aksyon ang pelikula "Higanti" ay'g saba!