On the wings of love
Nahunong ang among pag-estorya ni Malou kay misulod sa canteen sila si Gretchen ug Donald. Nag- holding hands sila. Wa ko kapugngi nga magselos. Bisag unsaon kog pugong sa akong kaugalingon, mobati gyud kog pangabubho. Di man unta kini nako angay bation kay di man ko girlfriend ni Donald. Apan tungod sa hilom kong
love niya, magselos gyud ko. “Nia sila paingon nato, Len.” Kunohay wa ko makakita nilang Gretchen ug Donald. Sa laing direksyon ko nagtan-aw. Miinom ko sa akong softdrinks. Naigking kunohay ko dihang gikuhit ko ni Gretchen.
“Uy, kamo man diay, Grets. Mag-esnak sab mo?” Gipugos ko ang akong kaugalingon sa pagpahiyom. Mipasiplat ko kang Malou. Hilom siyang mikidhat nako.
“Oo, uy. Mo- join mi sa inyong table, puwede?”
“Puwede kaayo, uy! Ngano gung di?”
“Sige, ha, mag-order pa ko sa atong esnak sa counter, Grets.”
Nakatan-aw ko kang Donald. Gipahiyoman ko siya. Mismile sab siya nako. Gisundan ko sa pagtan-aw ang akong secret love nga mipaingon sa counter. Kaguwapo gyud niya, uy! Kanindot kaha hapuhapon ang dagko niyang braso ug ang busok niyang dughan? Nakaingon ko sa akong kaugalingon. Macho si Donald. Naingon siya ani kay regular ang iyang pag- workout. “Komusta ka na, Lenlen?” Nakatan-aw ko kang Gretchen nga naglingkod na sa akong kilid. Nag-atbang mig lingkod si Malou, ug ang bakanteng duha ka lingkoranan diha sa masig-ka kilid nako.
“Tagsa na man lang ta magkaestorya, Len.”
“Mao lagi, Grets.” Miduko ko ug mingon ko sa hilom. “Unsaon man gud nga si Donald na man lang ang gitagaan mog dakong panahon. Wa ka na man maghatag og panahon sa atong friendship.” “Si Mark diay, Len?” “Kay ngano man diay si Mark?” Nadiyong ang akong mga mata nga mitan-aw og dugay kang Gretchen.
“Aw, kuan ba, dugay na man siyang nangulitawo nimo. Gisugot mo na gyud tingai siya?”
Nagpangidhat si Gretchen nako. Gingisloan ko siya. Wa ko motubag. “Uyab na mo, no, Len?” Milingu-lingo ko. Nahunong ang among pag-estorya ni Gretchen kay miduol na namo si Donald nga nagsapwang og tray nga gisudlan sa ilang pagkaon ug drinks ni Gretchen. Nakahunahuna ko nga mobiya kanila ni Gretchen. (SUMPAYAN)