GRASYA GIKAN SA TUBIG
Human sa dul-an 10 ka tuig nga paningkamot sa pagtungha dungan sa pagpaninda og tubig, matam-is nga kalamposan ang naani ni Jay Kummer 'Dodoy' Teberio.
Niadtong Miyerkules, nigraduwar si Dodoy sa kolehiyo sa kursong Bachelor of Science in Secondary Education major in Music, Arts, Physical Education and Health (Mapeh) sa University of Cebu- main campus, siyudad sa Sugbo. Human sa seremonya sa
graduation, nagsalosalo ang pamilya ni Dodoy sa lamiang mga pagkaon pinaagi sa catering uban ang iyang mga
classmate, suod nga higala, kabanay ug ubang dinapit nga mga bisita.
Pangandoy ni Dodoy nga mamahimo nga maestro ugma damlag.
Bisan sa kalisod sa ilang pamilya, gimatud-an sa 21-anyos nga ulitawo nga dili kini babag sa iyang pangandoy nga makahuman og eskwela. “Bisan og unsay mahitabo, go lang ng go. Fight fight fight. Never give up,” madasigon nga pulong niini sa iyang kaugalingon taliwa sa mga hagit ug suliran sa iyang kinabuhi. Sukad nag- viral ang iyang mga hulagway sa mga social media site sama sa Facebook, daghang mga tawo ang nibilib ug nakadayeg sa iyang paningkamot labi na sa iyang buhat pagtabang sa iyang mga ginikanan.
Si Dodoy, na- feature na sa Superbalita Cebu pinaagi sa Talikala diin ang iyang sugilanon namantala niadtong Nobiyembre 17, 2015.
Nagtungha pa lang si Dodoy sa Grade 6 dihang nagsugod siya og paninda og binotelya nga tubig ug ice tea pinaagi sa pagsuroy niini sa kadalanan labi na kon mohunong na ang mga sakyanan ug public-utility
jeepneys duol sa usa ka dako nga mall sa North Reclamation Area, dakbayan sa Sugbo.
Ang mga tawo mahimuot niya tungod kay magsul-ob siya og colorful nga costumes unya usahay magbutang og buwak sa iyang dunggan. Pakapinan pa kini niya og kiaykiay sa lawas, kanta, balitok ug tumbling.
Kinsa man ang dili malingaw ana?
Ang pagpaninda og tubig maoy taytayan ni Dodoy nga makahuman og eskwela diin ang iyang kita ihatag niya sa iyang pamilya samtang ang uban kay gipalit niya sa mga gamit sa pagtungha.
Ang sugilanon sa kinabuhi ni Dodoy nagsilbi nga inspirasyon sa ubang kabataan sa pagkab-ot usab sa ilang mga damgo sa kinabuhi.
Bisan sa kalamposan sa pag-eskwela, matod ni Dodoy, padayon siya nga mamaligya og tubig sul-ob ang iyang lainlaing costumes ug
props aron madani ang atensyon sa mga tawo.
“Dili ni nako biyaan kay mao ni nakatabang nako og eskwela ug nakatabang usab sa akong pamilya sa adlaw-adlaw nga panginahanglan. Di gyud ni nako biyaan,” dugang ni Dodoy. / SCG