Amonsot midaog na sab

MINNEAPOLIS – Nagtinguha og world title fight si Australiabased Boholano boxer Caesar Amonsot human niya gipakamang sa 8th

round si Hungarian Zsigmond Vass sa ilang away sa miaging adlaw sa Melbourne Pavillion, Flemington, Victoria, Australia. Si Amonsot, kinsa nagpuyo na Kilda, Victoria, Australia, nakadepensa sa iyang interim WBA Oceania light welterweight belt.

Sa kadaugan, misaka ang rekord ni Amonsot sa 34-3-3, 22KOS samtang nahagsa ang baraha ni Vass sa 12-5, 2KOs. Sa pakighinabi via online

chat sa SunStar Superbalita Cebu, si Amonsot nagkanayon nga anaa na siya sa saktong edad busa world championship na iyang rumbo karong panahuna.

“Ambot lagi kanus-a ko kadula og world title ani Sir gikapoy nko gukod sa suwerti,” batbat sa 31 anyos ug walhon nga boksingero.

Kini ang ika-16 nga sunodsunod nga kadaugan ni Amonsot human siya napildi pinaagi sa unanimous decision ni Australian Michael Katsidis sa Las Vegas niadtong 2007.

Si Amonsot rated #5 sa World Boxing Association (WBA) ug gigiyahan ni Australian trainer Rey Giles ug sa manager/promoter niining si Brian Amatruda.

Walay plano si Amonsot nga moretiro, gani gusto niya’ng ilugon ang bakus ni British WBA light welterweight champion Ricky Burns (41-5-1, 14 KOs). Andam sab moaway si Amonsot alang sa title eliminator bout. / Daniel Quindao Guden