Mga pulis, brgy. tanod magbantay
Kapulisan ug mga tanod sa lungsod sa Minglanilla gimandoan nga mobantay sa mga tunghaan hangtod nga makapauli ang mga tinunan sa ilang panimay.
Kini nunot sa giingong suway nga pagpanagit sa lungsod sa Minglanilla nga miresulta sa pagkasikop sa unom ka mga tawo.
Una niini nasikop sa kapulisan sa Minglanilla ang unom ka mga tawo usa kanila positibong giila sa bata nga misuwayg kupot kaniya paingon sakyanan.
Apan ang bata nakadagan balik sa ilang tunghaan ug ang mga magtutudlo na ug mga ginikanan maoy ni- report ngadto sa kapulisan nga miresulta sa pagkasikop sa unom ug sa ilang sakyanan.
Hinuon, hugtanong mihimakak ang mga dinakpan ug miingon nga binuang ra kadto ug lihitimo silang mga kawani sa mamaligya nga libro alang sa tunghaan.
Si Konsehal Jerry Canares, chairman sa committee on peace and order sa lungsod, nibutyag nga di na kumpyansahan karong panahona busa angay na nga adunay mubantay sa kabataan.
Matod ni Canares nga kon adunay magbantay sa tunghaan nga tanod o ba kaha pulis dili usab kini kasigurohoan nga way mahitabo sa gawas.
Kini human nga ang mga bata miuli nga maglakaw sa ilang balay nga way kuyog sa ilang mga ginikanan.
Matod niya nga kun mahimu ubanan sa kapulisan ang mga barangay tanod aron mabati sa mga bata ingon man ginikanan nga luwas sila sa mga tawong dautan.
Samtang si Konsehal Prose Fajutrao, chairman sa committee on Education, miingon nga niadto lang nga Lunes nagtagbo sila sa kapulisan mga principal ug guidance counselor usa kini sa ilang gituki human migawas ang mga report sa social media labot sa suway nga pagpanagit.
Usa sa ilang nasabot nga ipahibawo ang mga magtutudlo sa bisan asang tunghaan nga tawag dayun sa kapulisan kun unsa man gani ang mga panghitabo sa ilang tagsa-tagsa ka tunghaan.
Samtang, ang mga tinun-an pahimangnoan nga magbantay ug di mopatakag duol ug ipahibawo ang giingong van nga kolor puti.
Gipasalamatan ni Fajutrao nga misanong ang mga bata ug magtutudlo nga miresulta sa paspas nga pagpahibawo ngadto sa kapulisan nga miresulta gilayon sa pagkasikop sa mga responsabli.
Samtang si P/Supt. Dexter Calacar, pangu sa kapulisan sa lungsod sa Minglanilla, nibutyag nga di makaya sa ilang gidaghanon nga ibutang sa matag eskwelahan apan iyang gipasalig nga maglibot-libot ang kapulisan sa matag eskwelahan ug ibutang ang Barangay Peace Action Team (BPAT) uban sa mga tanod.
Hinuon, gawas sa tanod ug BPAT, mahimo sab nga magkauyon ang grupo sa mga ginikanan sa tunghaan nga mokuha og security guard aron mas daghan ang mubantay sa ilang mga kabataan.
Matod ni Calacar nga wa sila nagkumpyansa sa mga report ilabi na kay adunay nahitabong pagpanagit kaniadto nga miresulta sa pagpatay sa kaso ni Ella Joy Pique.
Naobserbahan sa Superbalita Cebu nga ang maong nimugna og positibong resulta human ang tanan nagmaninantayon na. /